டிராய் தலைவரின் பதவிக்காலம் 2 ஆண்டுகளுக்கு நீட்டிப்பு

தொலைத் தொடர்பு ஒழுங்காற்று ஆணையத்தின் (டிராய்) தலைவர் ராம் சேவாக் சர்மாவின்  பதவிக் காலம் இரண்டு ஆண்டுகளுக்கு நீட்டிக்கப்பட்டுள்ளது.
இதுகுறித்து மத்திய பணியாளர் அமைச்சகம் வெளியிட்ட உத்தரவில் தெரிவிக்கப்பட்டுள்ளதாவது: தற்போது டிராய் தலைவராக பதவி வகிக்கும் ராம் சேவாக் சர்மாவின் பதவிக் காலம் 2018 ஆகஸ்ட் 10-ஆம் தேதியுடன் நிறைவடையவுள்ளது. இந்த நிலையில், அவரது பதவிக் காலம் இரண்டு ஆண்டுகளுக்கு நீட்டிக்கப்பட்டுள்ளது. அதன்படி, வரும் 2020-ஆம் ஆண்டு செப்டம்பர் 30-ஆம் தேதி வரை அவர் அப்பதவியில் நீடிப்பார் என்று அந்த உத்தரவில் தெரிவிக்கப்பட்டுள்ளது. மத்திய அரசு, கடந்த 2015-ஆம் ஆண்டு ஜூலையில் டிராய் அமைப்பின் தலைவராக ராம் சேவாக் சர்மாவை மூன்றாண்டுகளுக்கு நியமித்தது. 
அவரது பதவிக்காலம் வெள்ளிக்கிழமையுடன் (ஆகஸ்ட் 10) நிறைவடையவுள்ள நிலையில் மத்திய அரசு இந்த பதவி நீட்டிப்பை வழங்கியுள்ளது குறிப்பிடத்தக்கது.