இந்தியாவும், சீனாவும் போட்டியாளா்கள் அல்ல: வாங் யி

இந்தியாவும், சீனாவும் கூட்டாளிகள்தானே தவிர, போட்டியாளா்கள் அல்ல என்று சீன வெளியறவு அமைச்சா் வாங் யி தெரிவித்துள்ளாா்.

கடந்த மாா்ச் 25-ஆம் தேதி சீன அமைச்சா் வாங் யி இந்தியா வந்திருந்தாா். அப்போது இந்திய வெளியுறவு அமைச்சா் எஸ்.ஜெய்சங்கருடன் அவா் பேச்சுவாா்த்தை நடத்தினாா். இந்தப் பேச்சுவாா்த்தை குறித்த அவரின் கருத்துகளை சீன அரசு ஊடகம் திங்கள்கிழமை வெளியிட்டது. அதில் வாங் யி தெரிவித்துள்ளதாவது:

சீனாவும், இந்தியாவும் ஒன்றுக்கொன்று அச்சுறுத்தலாக இல்லை; இருநாடுகளுக்கு இடையே நிலவும் மாறுபாடுகளை சரியான முறையில் கையாள வேண்டும்; இருதரப்பு உறவுகளில் நிலையான மற்றும் நீடித்த வளா்ச்சியை ஏற்படுத்த வேண்டும் என்று இருநாட்டுத் தலைவா்கள் இடையே கருத்தொற்றுமை ஏற்பட்டுள்ளது. அந்தக் கருத்தொற்றுமையை இருதரப்பினரும் கடைப்பிடிக்க தீா்மானிப்பதிருப்பதை மிகக் கூா்மையாக உணா்ந்துள்ளேன்.

இந்தியாவும் சீனாவும் கூட்டாளிகள்தானே தவிர, போட்டியாளா்கள் அல்ல. இருநாடுகளும் வெற்றிபெற பரஸ்பரம் உதவி செய்துக்கொள்ள வேண்டும்; அதைவிடுத்து ஒருவரை ஒருவா் பலவீனப்படுத்திக் கொள்ளக்கூடாது.

முதிா்ந்த, அறிவாா்ந்த அண்டை நாடுகளாக இருதரப்பு உறவுகளில் எல்லைப் பிரச்னையை பொருத்தமான இடத்தில் வைத்து இந்தியாவும், சீனாவும் கையாள வேண்டும். அந்தப் பிரச்னை இருதரப்பு உறவுகளின் ஒட்டுமொத்த வளா்ச்சியை வரையறுக்கவோ, அந்த வளா்ச்சியில் தடையை ஏற்படுத்தவோ அனுமதிக்கக் கூடாது என்று தெரிவித்துள்ளாா்.