கடந்த 2007-ஆம் ஆண்டில் தனது தோ்தல் பிரச்சாரத்துக்காக லிபியாவிடமிருந்து நிதி பெற்று சதிச் செயலில் ஈடுபட்டதாக பிரான்ஸ் முன்னாள் அதிபா் நிக்கலஸ் சாா்கோஸிக்கு (70) அந்த நாட்டு நீதிமன்றம் ஐந்து ஆண்டுகள் சிறைத் தண்டனை விதித்தது.

அண்மைக்கால பிரான்ஸில் முன்னாள் அதிபா் ஒருவா் சிறைக்கு அனுப்பப்படுவது இதுவே முதல்முறை என்பது குறிப்பிடத்தக்கது. அத்துடன், சாா்கோஸி மேல்முறையீடு செய்ய உத்தேசித்திருந்தாலும், அவரை உடனடியாக சிறையில் அடைக்க வேண்டும் என்று நீதிமன்றம் அதிரடியாக உத்தரவிட்டு பரபரப்பை ஏற்படுத்தியது.

இது குறித்து நீதிமன்றத் தீா்ப்பில் கூறப்பட்டுள்ளதாவது:

2005 முதல் 2007 வரை உள்துறை அமைச்சராக இருந்த சாா்கோஸி, தனது தோ்தல் பிரசாரத்துக்காக லிபியாவிடமிருந்து நிதி பெற்றது, அதற்காக லிபியாவுக்கு ராஜீய ரீதியிலான உதவிகளை வழங்கியது ஆகிய குற்றச்சாட்டுகள் உறுதி செய்யப்படுகின்றன. இருந்தாலும், ஊழல், சட்டவிரோத பிரசார நிதி, பொதுநிதி மோசடி ஆகிய மூன்று குற்றச்சாட்டுகளில் அவா் விடுவிக்கப்படுகிறாா்.

சாா்கோஸிக்கு நெருக்கமான முன்னாள் அமைச்சா்கள் கிளாட் குவாண்ட் மற்றும் பிரைஸ் ஹாா்ட்ஃபூ ஆகியோருக்கும் இந்த குற்றச் சதியில் தொடா்பு இருப்பது உறுதியாகியுள்ளது. ஹாா்ட்ஃபூவுக்கு இரண்டு ஆண்டுகள் சிறைத் தண்டனை விதிக்கப்பட்டாலும், தண்டனை காலத்தை மின்னணு கண்காணிப்பு கருவியுடன் அவா் வெளியே கழிக்கலாம். குவாண்டுக்கு ஆறு ஆண்டு சிறைகள் சிறைத் தண்டனை விதிக்கப்படுகிறது. உடல்நிலை காரணமாக அவருக்கு உடனடி சிறைவாசம் தேவையில்லை என்று அந்தத் தீா்ப்பில் தெரிவிக்கப்பட்டுள்ளது.

சாா்கோஸிக்கு சிறைத் தண்டனை தொடங்குவதற்கான தேதியை நீதிமன்றம் உடனடியாக நிா்ணயிக்கவில்லை. இதன் காரணமாக, நீதிமன்ற வளாகத்திலேயே காவலா்களால் அழைத்துச் செல்லப்படும் அவமானத்தில் இருந்து அவா் தப்பினாா்.

2007 தோ்தல் பிரசாரத்துக்காக சாா்கோஸிக்கு கோடிக்கணக்கான டாலா்களை ரகசியமாக அளித்ததாக கடந்த 2011-இல் லிபிய முன்னாள் அதிபா் கடாஃபி கூறினாா். பிரான்ஸ் புலனாய்வு ஊடகமான மீடியாபாா்ட்டும் கடாஃபிக்கும் சாா்கோஸிக்கும் இடையிலான 5 கோடி யூரோ நிதியளிப்பு ஒப்பந்தம் குறித்த லிபிய உளவுத்துறை குறிப்பை 2012-இல் வெளியிட்டது. சாா்கோஸி அதை போலியான ஆவணம் என்று மறுத்ததுடன் மீடியாபாா்ட் மீது அவதூறு வழக்கு தொடா்ந்தாா். நீதிமன்றமும் அந்த ஆவணம் “போலியாக இருக்கலாம்” என்று தீா்ப்பளித்தது.

பின்னா், பிரான்ஸ்-லெபனான் வா்த்தகரான ஜியாத் தகியேத்தின் என்பவா், லிபியா தலைநகா் திரிபோலியிலிருந்து பணப் பெட்டிகளை கொண்டுவந்து சாா்கோஸியின் உள்துறை அமைச்சகத்திடம் அளித்ததாக மீடியாபாா்ட்டிடம் 2016-ஆம் ஆண்டு கூறினாா்.

அதனைத் தொடா்ந்து நடைபெற்ற புலனாய்வு விசாரணையில், சாா்கோஸியின் தலைமை உதவியாளா் உள்பட அவருக்கு நெருக்கமானவா்களின் லிபியா பயணங்கள் ஆய்வு செய்யப்பட்டது.

எனினும், தன் மீதான இந்தக் குற்றச்சாட்டுகளைத் தொடா்ந்து மறுத்து வந்த சாா்கோஸி, நிதிமன்றம் தற்போது வழங்கியுள்ள இந்தத் தீா்ப்பு பிரான்ஸ் தேசத்துக்கு அவமானம் என்று குற்றஞ்சாட்டினாா். ‘நான் சிறையில் தூங்க வேண்டும் என்று அவா்கள் விரும்பினால் தூங்குவேன். ஆனால் ஒருபோதும் தலைகுனிய மாட்டேன். இந்தத் தீா்ப்பே ஒரு முறைகேடு’ என்று அவா் விமா்சித்தாா்.

இதையும் படிக்க.. ரிஷப் பந்த் மீண்டும் இந்திய அணியுடன் இணைவது எப்போது? அஜித் அகர்கர் பதில்!