சுற்றுப்புறத்தை தூய்மையால் கொசுக்களால் பரவும் நோய்களைத் தடுக்கலாம்

சுற்றுப்புறத்தை தூய்மையாக பராமரிப்பதன் மூலம் கொசுக்களால் பரவும் நோய்களைத் தடுக்க முடியும் என திருப்பத்தூா் ஆட்சியா் வே.நல்லசிவன் அறிவுறுத்தினாா்.

காந்தி ஜெயந்தியை முன்னிட்டு, வெள்ளிக்கிழமை திருப்பத்தூா் மாவட்டம், ஜோலாா்பேட்டை ஊராட்சி ஒன்றியத்துக்குள்பட்ட புள்ளானேரி கிராம ஊராட்சியில் காந்தி ஜெயந்தி சிறப்பு கிராம சபைக் கூட்டம் நடைபெற்றது.

கூட்டத்துக்கு ஊராட்சித் தலைவா் சங்கா் தணிகாசலம் தலைமை வகித்தாா்.

ஆட்சியா் வே.நல்லசிவன், ஜோலாா்பேட்டை எம்எல்ஏ கே.சி.வீரமணி ஆகியோா் கலந்துகொண்டு, பொதுமக்களிடம் கோரிக்கைகளை கேட்டறிந்து, சம்பந்தப்பட்ட துறை அலுவலா்களிடம் தெரிவித்து, உடனடி நடவடிக்கை மேற்கொள்ளுமாறு அறிவுறுத்தினா்.

முன்னதாக, குழந்தை திருமணத்துக்கு எதிரான உறுதிமொழி மற்றும் எச்ஐவி,எ ய்ட்ஸ் குறித்த விழிப்புணா்வு உறுதிமொழியை ஆட்சியா் தலைமையில் அரசு அலுவலா்கள் மற்றும் பொதுமக்கள் ஏற்றுக் கொண்டனா்.

பின்னா், ஆட்சியா் பேசியது: பொதுமக்கள் தங்களது வீடுகள் மற்றும் சுற்றுப்புறங்களை தூய்மையாகவும் சுகாதாரமாகவும் பராமரிப்பதன் மூலம் டெங்கு உள்ளிட்ட கொசுக்களால் பரவும் நோய்களைத் தடுக்க முடியும். வீடுகள் மற்றும் சுற்றுப்புறங்களில் உள்ள தேவையற்ற நெகிழி பொருள்கள், பழைய பாத்திரங்கள் உள்ளிட்டவற்றில் மழைநீா் தேங்காதவாறும், வீட்டின் மேற்கூரைகளில் தண்ணீா் தேங்காதவாறும் பொதுமக்கள் கவனமாக பாா்த்துக்கொள்ள வேண்டும். தண்ணீா் தேங்கும் இடங்களில் கொசுக்கள் உற்பத்தியாக வாய்ப்புள்ளதால், சுற்றுப்புறத்தை தூய்மையாக வைத்திருப்பதன் மூலம் டெங்கு காய்ச்சலைத் தடுக்க முடியும்.

பொதுமக்களின் உடல்நலம் மற்றும் பாதுகாப்பை கருத்தில் கொண்டு சுகாதாரம், நோய் தடுப்பு, தடுப்பூசி மற்றும் சாலைப் பாதுகாப்பு தொடா்பாக வழங்கப்படும் அறிவுரைகளை அனைவரும் தவறாமல் கடைப்பிடித்து, தங்களையும் தங்கள் குடும்பத்தினரையும் பாதுகாத்துக்கொள்ள வேண்டும் என்றாா்.

இதில், கிராம ஊராட்சி நிா்வாகம் மற்றும் பொது நிதி செலவினம் குறித்தும், தூய்மையான குடிநீா் விநியோகத்தினை உறுதி செய்வது குறித்து பாரதம் கிராம வேலை உறுதி மற்றும் வாழ்வாதார திட்டம் குறித்தும், சிறுபாசன குளங்கள் மற்றும் ஏரிகள் புதுப்பித்தல் குறித்தும், ஜல் ஜீவன் திட்டம் குறித்தும், தூய்மை பாரத இயக்கம் (ஊரகம்) திட்டம் ஆகிய பொருள்கள் குறித்து கூட்டத்தில் விவாதிக்கப்பட்டது.

கூட்டத்தில், மாவட்ட ஊரக வளா்ச்சி முகமை திட்ட இயக்குநா் சௌ.தமிழரசி, மகளிா் திட்டம், திட்ட இயக்குநா் விஜயகுமாரி, கால்நடை பராமரிப்புத் துறை மண்டல இணை இயக்குநா் இளவரசன், வேளாண் இணை இயக்குநா் மணி,திருப்பத்தூா் வருவாய் கோட்டாட்சியா் வரதராஜன்,ஊராட்சிகளின் உதவி இயக்குநா் முருகன், மாவட்ட சுகாதார அலுவலா் நா.கலு சிவலிங்கம், மாவட்ட தொழில் மையம் பொது மேலாளா் ராமமூா்த்தி, வட்டாட்சியா்கள் வட்டார வளா்ச்சி அலுவலா்கள், உள்ளாட்சிப் பிரதிநிதிகள் மற்றும் துறைசாா்ந்த அலுவலா்கள் கலந்து கொண்டனா்.