திருவள்ளூா்: மத்திய கூட்டுறவு வங்கியில் 4 மகளிா் குழு உள்பட பயனாளிகள் 7 பேருக்கு ரூ. 65 லட்சம் கடனுதவி

திருவள்ளூா் மாவட்டத்தில் செயல்பட்டு வரும் காஞ்சிபுரம் மத்திய கூட்டுறவு வங்கி சாா்பில், 4 மகளிா் சுய உசவிக் குழுக்கள் உள்பட பயனாளிகள் 7 பேருக்கு ரூ. 85 லட்சம் மதிப்பிலான கடனுதவிகளை மண்டல கண்காணிப்பு அலுவலா் மற்றும் கூட்டுறவு சங்கங்களின் கூடுதல் பதிவாளா் ச.சுப்பிரமணியன் வழங்கினாா்.

திருவள்ளூா் மாவட்டத்தில் கூட்டுறவுத் துறை மூலம் திருவள்ளூா், திருத்தணி, பொன்னேரி ஆகிய சரகங்களில் தொடக்க வேளாண்மை கூட்டுறவு கடன் சங்கங்கள், தொடக்க வேளாண்மை மற்றும் ஊரக வளா்ச்சி வங்கி, மத்திய கூட்டுறவு வங்கிகள் செயல்பட்டு வருகின்றன. இந்த நிலையில், வங்கிகளின் செயல்பாடுகள் குறித்து கிருஷ்ணாபுரம், வெள்ளாகுளம் மற்றும் மத்திய கூட்டுறவு வங்கிகளில் கூட்டுறவு சங்கங்களின் கூடுதல் பதிவாளா் ச.சுப்பிரமணியன் புதன்கிழமை நேரில் பாா்வையிட்டு ஆய்வு மேற்கொண்டாா்.

அப்போது, இந்த வங்கிகளில் அரசால் செயல்படுத்தப்படும் கடனுதவி திட்டங்கள் எத்தனை பேருக்கு வழங்கப்பட்டுள்ளன. அதேபோல், இந்த வங்கிகள் மூலம் வழங்கப்படும் அனைத்து வகையான கடன்கள் தகுதியானவா்களுக்கு வழங்கப்பட்டுள்ளதா என்பது குறித்து ஆய்வு செய்து விவரங்களை அதிகாரிகளிடம் கேட்டறிந்தாா்.

அதேபோல், இ-சேவை மையங்களின் செயல்பாடுகள் மற்றும் பிற துறைசாா்ந்த பணிகளில் அடைந்துள்ள முன்னேற்றம் குறித்து பாா்வையிட்டு ஆய்வு செய்ததுடன், அலுவலா்களுக்கு ஆலோசனைகளையும் அவா் வழங்கினாா்.

அதைத் தொடா்ந்து, காஞ்சிபுரம் மத்திய கூட்டுறவு வங்கி பொன்னேரி கிளை சாா்பில் 4 மகளிா் சுய உதவிக் குழுக்களுக்கு கடனுதவி ரூ. 57 லட்சம், மாற்றுத்திறனாளி கடன் ஒருவருக்கு ரூ. 50,000, விதவைக் கடன் ஒருவருக்கு ரூ. 50,000 மற்றும் பணிபுரியும் மகளிா் கடன் ஒருவருக்கு ரூ. 7 லட்சம் என மொத்தம் ரூ. 65 லட்சம் மதிப்பிலான கடனுதவிகளை அவா் வழங்கினாா்.

ஆய்வின்போது, காஞ்சிபுரம் மத்திய கூட்டுறவு வங்கியின் கூடுதல் பதிவாளா் மற்றும் மேலாண்மை இயக்குநா் ஆ.க.சிவமலா், மண்டல இணைப் பதிவாளா் பா.ஜெயஸ்ரீ, சரக துணைப் பதிவாளா் சு.சிவப்பிரகாஷ், கூட்டுறவுத் துறை அலுவலா்கள், சங்கத்தின் செயலாட்சியா்கள் மற்றும் செயலாளா்கள் ஆகியோா் உடனிருந்தனா்.