ஆம்பூரில் சூறாவளிக் காற்றுடன் கனமழை

ஆம்பூர் மற்றும் கிராமப் பகுதிகளில் புதன்கிழமை கனமழை பெய்தது. இதன் காரணமாக ஆங்காங்கே மரங்கள் வேரோடு சாய்ந்தன.
வேலூர் மாவட்டத்தில் கடந்த ஒரு வாரத்துக்கு மேலாகவே கடுமையான வெயில் நிலவி வந்தது.  கோடைக்காலம் போல கடுமையான வெயில் சுட்டெரித்ததால் பொதுமக்கள் கடுமையாக பாதிக்கப்பட்டனர்.  
இந்நிலையில், ஆம்பூர் மற்றும் சுற்றுப்புற கிராமப் பகுதிகளில் புதன்கிழமை மாலை சுமார் 5.30 மணிக்கு திடீரென வானில் கருமேகங்கள் சூழ்ந்து மழை பெய்யத் தொடங்கியது. 
 சூறாவளிக் காற்றுடன் தொடங்கிய கனமழை சுமார் ஒரு மணி நேரம் இடைவிடாமல் பெய்தது. ஆம்பூர் அருகே சுற்றுப்புற கிராமங்களிலும் கனமழை பெய்தது.  
இதனால் ஆம்பூர் அருகே தேவலாபுரம் ஊராட்சி ராமசந்திராபுரம் கிராமம் எட்டியம்மன் கோயில் அருகே இருந்த பழைமையான அரச மரம் வேரோடு சாய்ந்து விழுந்தது. இதேபோல் பல்வேறு கிராமங்களிலும் மரங்கள் சாய்ந்தன.
சுமார் ஒரு மணி நேரம் பெய்த கனமழை காரணமாக ஆம்பூர் நகரின் பெரும்பாலான தெருக்களில் வெள்ளம் பெருக்கெடுத்து ஓடியது. மழை காரணமாக குளிர்ந்த சூழ்நிலை நிலவியது.