ரூ. 77 லட்சம் கையாடல்: கே.வி.குப்பம்  கூட்டுறவு வங்கி ஊழியர்கள் 4 பேர் கைது

கே.வி.குப்பம் அருகே கூட்டுறவு வங்கியில் ரூ. 77 லட்சம் கையாடல் செய்ததாக வங்கியின் முன்னாள் மேலாளர் உள்பட 4 பேரை வேலூர் மாவட்ட பொருளாதார குற்றப்பிரிவு போலீஸார் கைது செய்துள்ளனர்.
கே.வி.குப்பம் அருகே பெருமாள்குப்பம் பகுதியில் தொடக்க வேளாண்மை கூட்டுறவு வங்கி செயல்பட்டு வருகிறது. இந்த வங்கியில் கூட்டுறவு துணைப் பதிவாளர் பாஸ்கரன் மேற்கொண்ட கணக்குத் தணிக்கையில் கடந்த 2013 முதல் 2017-ஆம் ஆண்டு வரை வங்கியில் முதலீடான தொகையில் சுமார் ரூ. 1 கோடி அளவுக்கு தொகை கணக்கில் வராமல் இருப்பது தெரியவந்தது. 
இதுதொடர்பாக, பாஸ்கரன் வேலூர் மாவட்ட பொருளாதார குற்றப்பிரிவில் புகார் செய்தார். அதன்பேரில், போலீஸார் மேற்கொண்ட விசாரணையில், அந்த வங்கியின் முன்னாள் மேலாளரான காட்பாடி வட்டம், முருகம்பட்டு பகுதியைச் சேர்ந்த சொக்கலிங்கம் (65), செயலரான குடியாத்தம், சேத்துவண்டையைச் சேர்ந்த நேதாஜி (50), உதவியாளர் அலங்காநேரியைச் சேர்ந்த சிதம்பரம் (40), காவலாளியான பெருமாள்குப்பத்தைச் சேர்ந்த உலகநாதன் (55) ஆகியோருக்கு இந்த கையாடலில் தொடர்பு இருப்பது தெரியவந்தது. 
அதேசமயம், விசாரணையின்போதே சுமார் ரூ. 20 லட்சம் பறிமுதல் செய்யப்பட்டது. ஆனால், ரூ. 77 லட்சம் திருப்பிச் செலுத்தப்படாததை அடுத்து அவர்கள் 4 பேரையும் பொருளாதார குற்றப்பிரிவு போலீஸார் புதன்கிழமை இரவு கைது செய்தனர். 
இதில், செயலர் நேதாஜி, உதவியாளர் சிதம்பரம், காவலாளி உலகநாதன் ஆகியோர் ஏற்கெனவே பணியிடைநீக்கம் செய்யப்பட்டுள்ளனர். தொட ர்ந்து அவர்கள் மீது சட்டரீதியான நடவடிக்கைகள் மேற்கொள்ளப்படும் என்றும் பொருளாதார குற்றப்பிரிவு போலீஸார் தெரிவித்தனர்.