சிறுமுகை சின்னக் கள்ளிப்பட்டி பத்ரகாளியம்மன் கோயில் கும்பாபிஷேகம்

கோவை மாவட்டம், சிறுமுகை அருகேயுள்ள சின்னக் கள்ளிப்பட்டி பத்ரகாளியம்மன் கோயில் கும்பாபிஷேகம் புதன்கிழமை நடைபெற்றது.
பழைமையான பத்ரகாளியம்மன் கோயில் சீரமைப்புப் பணிகள் அண்மையில் நிறைவடைந்தன. இதைத் தொடர்ந்து கும்பாபிஷேக விழா கடந்த 9ஆம் தேதி பவானி ஆற்றில் இருந்து புனித நீர் எடுத்து வரும் நிகழ்ச்சியுடன் தொடங்கியது. பின்னர், ஓதிமலை ஆண்டவர் கோயில் சண்முக சுப்பிரமணியம் தலைமையில் கணபதி சிவாச்சாரியார், திருமடம் கிரிவாச சிவம் ஆகியோர் கணபதி ஹோமம், நவக்கிரக ஹோமம், கோ பூஜை, முதல் கால வேள்வி ஆகியவற்றை நடத்தினர்.
 இதையடுத்து 11ஆம் தேதி இரண்டாம் கால வேள்வியும், கோபுர கலசம் நிறுவுதல், மூன்றாம் கால யாக வேள்வி ஆகியவை நடைபெற்றன. பின்னர், புதன்கிழமை அதிகாலை 5 மணிக்கு நான்காம் கால யாக வேள்வியும், இதைத் தொடர்ந்து நாதசுரம், மேளதாளங்கள் முழங்க, வான வேடிக்கைகளுடன் தீர்த்தக் குடங்கள் கோயிலை வலம் வந்தன.  பின்னர், காலை 7 மணியளவில் விஜயலட்சுமி பொதுநல அறக்கட்டளை நிறுவனர் ஓ.ஆறுமுகசாமி முன்னிலையில், கூனம்பட்டி ஆதீனம் நடராஜ 
சுவாமிகள் கோபுர கலசங்களுக்கு புனித நீரை ஊற்றி கும்பாபிஷேகம் செய்து வைத்தார். இதையடுத்து பொதுமக்களுக்கு அன்னதானம் வழங்கப்பட்டது.  விழாவில், மாநிலங்களவை உறுப்பினர் ஏ.கே.செல்வராஜ், மேட்டுப்பாளையம் எம்.எல்.ஏ. சின்னராஜ், காவல் துணை கண்காணிப்பாளர் வெள்ளிங்கிரி, ஊர் பொதுமக்கள் உள்ளிட்ட பலர் பங்கேற்றனர்.