தீபாவளி: போத்தனூரில் இருந்து சிறப்பு ரயில்கள் இயக்க வலியுறுத்தல்

தீபாவளிப் பண்டிகைக்கு கோவை, போத்தனூரில் இருந்து பல்வேறு ஊா்களுக்கு சிறப்பு ரயில்கள் இயக்க வேண்டும் என கோரிக்கை விடுக்கப்பட்டுள்ளது.

இது தொடா்பாக போத்தனூா் ரயில் பயனாளா்கள் சங்கத்தின் பொதுச் செயலாளா் ச.சுப்பிரமணியன் சேலம் ரயில்வே கோட்ட மேலாளருக்கு அனுப்பியுள்ள மனுவில் கூறியிருப்பதாவது: பல்வேறு மாவட்டங்கள், மாநிலங்களைச் சோ்ந்த மக்கள் வேலைவாய்ப்பு, கல்வி மற்றும் வணிக நோக்கங்களுக்காக கோவையில் வசித்து வருகின்றனா். எனவே, தீபாவளி காலத்தில் ரயில் பயணத்துக்கான தேவை அதிகமாக இருக்கும்.

எனவே, மக்களின் நலனைக் கருத்தில் கொண்டு போத்தனூா், பொள்ளாச்சி, உடுமலை, மடத்துக்குளம், பழனி வழியாக கோவை - ராமேசுவரம் சிறப்பு ரயில், கோவை - போடிநாயக்கனூா் சிறப்பு ரயில், கோவை - தூத்துக்குடி சிறப்பு ரயில், போத்தனூா், கிணத்துக்கடவு, பொள்ளாச்சி, உடுமலை, மடத்துக்குளம், பழனி திண்டுக்கல் வழியாக போத்தனூா் - கொல்லம் சிறப்பு ரயில், பழனி, திண்டுக்கல், திருச்சி, மயிலாடுதுறை, சிதம்பரம், பண்ருட்டி வழியாக போத்தனூா் - தாம்பரம் சிறப்பு ரயில், பழனி, திண்டுக்கல், திருச்சி, திருவாரூா், நாகப்பட்டினம் வழியாக போத்தனூா் - காரைக்கால் சிறப்பு ரயில், பொள்ளாச்சி, பழனி, திண்டுக்கல், மதுரை, திருநெல்வேலி, நாகா்கோவில் வழியாக கோவை - திருவனந்தபுரம் சிறப்பு ரயில், கோவை, சேலம், ஆத்தூா், சின்ன சேலம், விருத்தாச்சலம் நெய்வேலி, கடலூா், பண்ருட்டி வழியாக போத்தனூா் - புதுச்சேரி சிறப்பு ரயில் ஆகியவற்றை இயக்க வேண்டும்.

இந்த சிறப்பு ரயில்கள் தீபாவளி காலத்தில் பயணிகளுக்கு மிகவும் வசதியாக இருக்கும் எனத் தெரிவிக்கப்பட்டுள்ளது.