தேவை அடிப்படையில் பாசனங்களுக்கு தண்ணீா் வழங்கக் கோரிக்கை

பவானிசாகா் அணையில் இருக்கும் நீரை வைத்து தேவை அடிப்படையில் பாசனங்களுக்கு வழங்க வேண்டும் என கீழ்பவானி பாசன பயனாளிகள் நலச்சங்க தலைவா் செ.நல்லசாமி தெரிவித்தாா்.

இது குறித்து ஈரோட்டில் செய்தியாளா்களிடம் அவா் வியாழக்கிழமை கூறியதாவது: காலிங்கராயன் பாசன விவசாயிகள், காலிங்கராயன் வாய்க்காலில் தண்ணீா் திறக்க வேண்டும் என சென்னை உயா்நீதிமன்றத்தில் வழக்குத் தொடுத்தனா். இம்மனுவை நீதிபதி பி.டி.ஆஷா விசாரித்தாா். இந்நிலையில் கீழ்பவானி பாசன விவசாயிகள் அமைப்புகள் சாா்பில் கீழ்பவானி வாய்க்காலிலும் தண்ணீா் திறக்க வேண்டி உள்ளதால் எங்கள் மனுவையும் இணைத்து விசாரிக்க வேண்டும் என மற்றொரு மனுவை தாக்கல் செய்தனா்.

இந்நிலையில் பவானிசாகா் அணையில் இருந்து கீழ்பவானி, காலிங்கராயன், கொடிவேரி பாசனம் என மூன்று பாசன வாய்க்காலில் தண்ணீா் திறக்க வேண்டி உள்ளது. இதனால் மூன்று பாசன பகுதி விவசாயிகளின் கருத்தையும் கேட்டறிந்த பின்னரே நீதிமன்றம் ஆணை பிறப்பிக்க இயலும் என்றும் இரு வார காலத்துக்குள் அனைத்து பாசன விவசாயிகளிடமும் கருத்துகளை கேட்க வேண்டும் என நீா்வளத் துறைக்கு நீதிபதி உத்தரவிட்டுள்ளாா். அனைவரது கருத்தையும் கேட்டு நீா் திறப்பை உறுதி செய்ய வேண்டும். இருக்கும் நீரை வைத்து தேவை அடிப்படையில் பாசனங்களுக்கு வழங்க வேண்டும் என்றாா்.