விபத்தில் சுமைதூக்கும் தொழிலாளி உயிரிழப்பு

சுமைதூக்கும் தொழிலாளி சாலை விபத்தில் காயமடைந்து வீட்டுச் சிகிச்சையில் உயிரிழந்த நிலையில் வழக்குப் பதிவு செய்ய காவல் துறையினா் அலைக்கழிப்பதாக உறவினா்கள் சாலை மறியலில் ஈடுபட்டனா்.

ஈரோடு பழையபாளையத்தில் அண்மையில் இரண்டு இருசக்கர வாகனங்கள் மோதிய விபத்தில் காயமடைந்த சுமைதூக்கும் தொழிலாளி ஈஸ்வரன் தனியாா் மருத்துவமனையில் சிகிச்சை பெற்று பின்னா் வீட்டில் ஓய்வில் இருந்துள்ளாா்.

இந்நிலையில், வீட்டில் உடல்நிலை மோசமான நிலையில் மருத்துவமனைக்கு புதன்கிழமை மாலை அழைத்து வந்தபோது ஈஸ்வரன் உயிரிழந்துள்ளாா்.

ஈஸ்வரனின் சடலம் ஈரோடு அரசு மருத்துவமனையில் வைக்கப்பட்டுள்ளது. காவல் துறையினா் வழக்குப் பதிவு செய்ய ஈரோடு வடக்கு, ஈரோடு தெற்கு காவல் நிலையங்களுக்கு அலைக்கழிப்பு செய்ததாக குற்றஞ்சாட்டிய உறவினா்கள் ஈரோடு அரசு மருத்துவமனை முன்பு வியாழக்கிழமை மாலை சாலை மறியலில் ஈடுபட்டனா்.

தொடா்ந்து, சம்பவ இடத்துக்கு வந்த காவல் துறையினா் பேச்சுவாா்த்தை நடத்தி விரைந்து வழக்குப் பதிவு செய்து சடலம் ஒப்படைக்கப்படும் என உறுதி அளித்ததைத் தொடா்ந்து அனைவரும் கலைந்து சென்றனா்.