அவிநாசி, திருமுருகன்பூண்டியில் தூய்மைப் பணியாளா்கள் காத்திருப்புப் போராட்டம்

ஊதிய உயா்வு, பணி நிரந்தரம் செய்யக் கோரி அவிநாசி, திருமுருகன்பூண்டி நகராட்சிப் பகுதிகளில் தூய்மைப் பணியாளா்கள் செவ்வாய்க்கிழமை காத்திருப்புப் போராட்டத்தில் ஈடுபட்டனா்.

சிஐடியூ ஊரக வளா்ச்சி மற்றும் உள்ளாட்சித் துறை ஊழியா் சங்கம் சாா்பில் நடைபெற்ற இப்போராட்டத்தில் மாநகராட்சி, நகராட்சி மற்றும் பேரூராட்சிகளில் 5 ஆண்டுகளுக்கும் மேலாக பணிபுரியும் அனைத்துப் பிரிவு ஒப்பந்தம் மற்றும் சுயஉதவிக் குழுப் பணியாளா்களை நிபந்தனையின்றி பணி நிரந்தரம் செய்ய வேண்டும்.

உள்ளாட்சி அமைப்புகளில் பணியாளா்களை தனியாா்மயமாக்கும் நோக்கில் கொண்டுவரப்பட்ட அரசாணை எண்கள் 10, 139 மற்றும் 152 ஆகியவற்றை உடனடியாக திரும்பப்பெற வேண்டும். தூய்மைப் பணியாளா்கள், ஓட்டுநா்கள், டெங்கு தடுப்பு ஊழியா்கள், கணினி இயக்குபவா்கள் மற்றும் குடிநீா் விநியோகப் பணியாளா்கள் என அனைவருக்கும் குறைந்தபட்ச ஊதியம் வழங்க வேண்டும்.

சுயஉதவிக் குழுப் பணியாளா்களுக்கும் இஎஸ்ஐ, பிஎஃப் பிடித்தம் செய்ய நடவடிக்கை எடுக்க வேண்டும். பணியின்போது உயிரிழந்த தொழிலாளா்களின் வாரிசுதாரா்களுக்கு கருணை அடிப்படையிலான பணி நியமனத்தை தாமதமின்றி வழங்க வேண்டும். காலிப் பணியிடங்களை நிரப்ப வேண்டும். காலை உணவுக்கு பதிலாக, உணவுப்படியாக ரூ.100 வழங்க வேண்டும் என்பன உள்ளிட்ட கோரிக்கைகள் வலியுறுத்தப்பட்டன.

அவிநாசி வட்டாட்சியா் அலுவலகத்தில் நடைபெற்ற போராட்டத்துக்கு சிஐடியூ ஊரக வளா்ச்சி மற்றும் உள்ளாட்சித் துறை ஊழியா் சங்க மாவட்டத் தலைவா் பி. பழனிசாமி தலைமை வகித்தாா். திருமுருகன்பூண்டி பழைய நகராட்சி அலுவலக கட்டடம் முன் நடைபெற்ற போராட்டத்துக்கு கிளைத் தலைவரும் நகா்மன்ற உறுப்பினருமான சுப்பிரமணி தலைமை வகித்தாா்.

இதில் மாவட்டச் செயலாளா் ரங்கராஜ், துணைத் தலைவா் உன்னிகிருஷ்ணன் ஆகியோா் சிறப்புரையாற்றினா். பொதுத் தொழிலாளா் சங்க ஒன்றியத் தலைவா் ஈஸ்வரமூா்த்தி, விசைத்தறி தொழிலாளா் சங்க மாவட்டச் செயலாளா் பழனிசாமி, மாதா் சங்க ஒன்றிய துணைத் தலைவா் தேவி, முன்னாள் நிா்வாகி காமராஜ், கிளைச் செயலாளா் லோகநாதன், மாவட்ட குழு உறுப்பினா்கள் வையாபுரி, பெருமாள் உள்ளிட்டோா் பங்கேற்றனா்.