கந்திகுப்பத்தில் பகுதி நேர நியாய விலைக் கடை திறப்பு

பர்கூர் சட்டப்பேரவைத் தொகுதிக்குள்பட்ட கந்திகுப்பத்தில் 912 குடும்ப அட்டைதாரர்கள் பயன் பெறும் வகையில் பகுதி நேர நியாய விலைக் கடையை தமிழ்நாடு இளைஞர் நலன் மற்றும் விளையாட்டு மேம்பாட்டுத் துறை அமைச்சர் பா.பாலகிருஷ்ணா ரெட்டி புதன்கிழமை திறந்து வைத்தார்.
கந்திகுப்பத்தில் உள்ள 1,132 குடும்ப அட்டைதாரர்களில் பலர் தங்களது அத்தியாவசியப் பொருள்களை தேசிய நெடுஞ்சாலையைக் கடந்து அங்குள்ள நியாய விலைக் கடையில் வாங்கி வந்தனர். இதனால், ஏற்படும் விபத்தால் பலர் உயிரிழந்தனர். இந்த நிலையில், தேசிய நெடுஞ்சாலையைக் கடந்து செல்லாத வகையில் புதிய நியாய விலைக் கடையை திறக்க வேண்டும் என அரசுக்கு கோரிக்கை வைத்தனர்.
இதையடுத்து, 912 குடும்ப அட்டைதாரர்கள் பயன்பெறும் வகையில், பகுதி நேர நியாய விலைக் கடையை தமிழ்நாடு இளைஞர் நலன் மற்றும் விளையாட்டு மேம்பாட்டுத் துறை அமைச்சர் பா.பாலகிருஷ்ணா ரெட்டி திறந்து வைத்து பேசியது: இந்த நியாய விலைக் கடையானது மக்களின் வேண்டுதலுக்கு ஏற்ப திறக்கப்பட்டுள்ளது. பழைய கடையானது வாரத்துக்கு இரண்டு நாள்கள் செயல்படும். கந்திகுப்பத்தில் தேசிய நெடுஞ்சாலையில் மேம்பாலம் கட்ட வேண்டும் என பொதுமக்கள் கோரிக்கை வைத்துள்ளனர். இதுகுறித்து அரசுக்கு கருத்துரு அனுப்பப்பட்டுள்ளது. விவசாயிகளின் கோரிக்கைகளை ஏற்று பெரிய ஏரியின் கால்வாய் விரைவில் சீரமைக்கப்படும் என்றார்.  
இந்த நிகழ்ச்சிக்கு கிருஷ்ணகிரி மாவட்ட ஆட்சியர் எஸ்.பிரபாகர் தலைமை வகித்தார். கே.அசோக்குமார் எம்.பி, சி.வி.ராஜேந்திரன் எம்.எல்.ஏ, கூட்டுறவு சங்கங்களின் துணைப் பதிவாளர்கள் செல்வகுமார், ராதாகிருஷ்ணன், பர்கூர் ஊராட்சி ஒன்றிய முன்னாள் தலைவர் ஜெயபாலன் உள்ளிட்டோர் பங்கேற்றனர். இந்த நிகழ்ச்சியில் 15 பயனாளிகளுக்கு மின்னணு குடும்ப அட்டை வழங்கப்பட்டது.