மோகனூா் திமுக பிரமுகரிடம் ரூ. 2.50 கோடி மோசடி: ராசிபுரம் நகா்மன்ற சுயேச்சை உறுப்பினரின் கணவா் கைது

மோகனூா் திமுக பிரமுகரிடம் ரூ.2.50 கோடி மோசடி செய்ததாக ராசிபுரம் நகா்மன்ற சுயேச்சை உறுப்பினரின் கணவரை மாவட்ட குற்றப்பிரிவு போலீஸாா் புதன்கிழமை கைது செய்தனா்.

நாமக்கல் மாவட்டம், மோகனூரைச் சோ்ந்தவா் செல்லவேல் (49). இவா், திமுக பேரூா் செயலாளராகவும், பேரூராட்சி உறுப்பினராகவும் உள்ளாா். இவருக்கு, ராசிபுரம் நகா்மன்ற 12ஆவது வாா்டு சுயேச்சை உறுப்பினா் சசிரேகா, அவரது கணவா் சதீஷ், மாமனாா் வெங்கடாசலம் ஆகியோருடன் பழக்கம் ஏற்பட்டது.

அப்போது, ‘ஏரியல் ட்ரோபோடிக்ஸ்’ என்ற பெயரில் சீன பொருள்களின் மொத்த வியாபாரத்தை செய்து வருவதாகவும், விமானங்கள், ஹெலிகாப்டா் ஆகியவை ஒப்பந்த அடிப்படையில் எடுத்துச் சுற்றுலாவிற்கு பயன்படுத்தி வருவதாகவும், அந்தத் தொழிலில் முதலீடு செய்பவா்களுக்கு பாதி விலையில் காா்களை வாங்கித் தருவதாகவும் செல்லவேலிடம் அவா்கள் தெரிவித்துள்ளனா். இதை நம்பிய செல்லவேல், கடந்த 2020, டிச.29-இல் சதீஷ் அவரது மனைவி சசிரேகா ஆகியோரிடம் ரூ. 17.70 லட்சம் வழங்கியதாகவும், நேரடியாகவும், வங்கிக் கணக்கு மூலமாகவும், பல கட்டமாக ரூ. 2.49 கோடி வரை பணம் கொடுத்ததாகவும் தெரிகிறது. ஆனால், அவா்கள் பாதி விலையில் காா்களை வாங்கித் தரவில்லை.

இதுகுறித்து, நேரிலும், போன் மூலமும் தொடா்பு கொண்டு கேட்டபோது சதீஷ் தரப்பில் காலம்தாழ்த்தி வந்தனா். இந்த நிலையில் சதீஷ் தரப்பில் ரூ. 2.50 கோடிக்கு மூன்று காசோலைகளை வழங்கினா். அதில், ரூ. 1 கோடிக்கான காசோலை 2023, ஆக.11இல் செல்லவேல் வங்கிக் கணக்கில் வரவு வைக்க தாக்கல் செய்தாா். ஆனால், மூன்று நாள்களில் அவா்களது கணக்கில் பணம் இல்லை என திரும்பி வந்துவிட்டது. இதனால், அதிா்ச்சியடைந்த அவா், சதீஷ், சசிரேகா மற்றும் வெங்கடாசலம் ஆகியோா் பற்றி விசாரித்ததில் அவா்கள் போலி ஆவணங்களை பயன்படுத்தி பலரிடம் மோசடி செய்திருப்பது தெரியவந்தது.

அதன்பிறகு, மாவட்ட குற்றப்பிரிவு போலீஸில் 2023-இல் செல்லவேல் புகாா் அளித்தாா். என்னுடைய மனு மீது விசாரணை நடத்தி பணத்தை மீட்டு, தருவதோடு, குடும்பத்திற்கும், எனக்கும் பாதுகாப்பு அளிக்க வேண்டும், மோசடி செய்த சதீஷ், அவரது மனைவி சசிரேகா, தந்தை வெங்கடாசலபதி ஆகியோரை கைது செய்ய வேண்டும் என அவா் தெரிவித்திருந்தாா்.

அந்தப் புகாரின் பேரில் போலீஸாா் விசாரணை மேற்கொண்டனா். ஆனால் கைது நடவடிக்கை எதுவும் அப்போது எடுக்கப்படவில்லை. இந்த நிலையில், நாமக்கல் மாவட்ட குற்றப்பிரிவு ஆய்வாளா் இந்திராணி, அந்த மோசடி வழக்கு தொடா்பாக சம்பந்தப்பட்ட சதீஷை புதன்கிழமை கைது செய்து விசாரணை நடத்தி வருகிறாா்.