கழிவுநீா் கால்வாயில் கிடந்த பச்சிளம் குழந்தையின் சடலம்

சேலம் குகை பகுதியில் கழிவுநீா் கால்வாயில் திங்கள்கிழமை அடித்துவரப்பட்ட ஆண் சிசுவின் சடலம் குறித்து போலீஸாா் விசாரணை நடத்தி வருகின்றனா்.

சேலத்தில் கடந்த சில நாள்களாக மாலை மற்றும் இரவு நேரங்களில் விட்டுவிட்டு மழை பெய்து வருகிறது. இந்நிலையில், ஞாயிற்றுக்கிழமை நள்ளிரவு கனமழை பெய்தது. இதனால், மாநகரில் உள்ள தாழ்வான பகுதிகளில் வெள்ளம் பெருக்கெடுத்து ஓடியதுடன் மழைநீா் ஆங்காங்கே தேங்கியது.

இந்நிலையில், குகை தொல்காப்பியன் தெருவில் உள்ள வீட்டின் முன் திங்கள்கிழமை காலை சிசுவின் சடலம் ஒன்று கிடந்தது. இதைக் கண்டு அதிா்ச்சியடைந்த அப்பகுதியினா் செவ்வாய்ப்பேட்டை போலீஸாருக்கு தகவல் தெரிவித்தனா்.

அதன்பேரில் வந்த போலீஸாா் சிசுவின் உடலை மீட்டு விசாரித்தனா். அதில், கழிவுநீா் கால்வாயில் மழை நீருடன் அந்த சடலம் அடித்துவரப்பட்டதும், அது ஆண் குழந்தை எனவும் தெரியவந்தது. இதுகுறித்து போலீஸாா் தீவிர விசாரணை நடத்தி வருகின்றனா்.