ஊழல் செய்த தமிழக அமைச்சர்கள்  விரைவில் சிறைக்குச் செல்வர்: கர்நாடக அமமுக செயலர் புகழேந்தி பேட்டி

ஊழல் செய்த தமிழக அமைச்சர்கள் விரைவில் சிறைக்குச் செல்வார்கள் எனஅமமுக கர்நாடக மாநில செயலர் புகழேந்தி தெரிவித்தார்.
கொடைக்கானலுக்கு புதன்கிழமை வந்த அவர் செய்தியாளர்களிடம் கூறியதாவது: தமிழகத்தில் தற்போது நடைபெற்று வரும் ஆட்சி மக்களிடத்தில் எடுபட வில்லை. தமிழக அமைச்சர்களின் ஊழல்பட்டியல் வெளிவந்து கொண்டிருக்கிறது. 
ஊழல் செய்த அமைச்சர்கள் விரைவில் சிறைக்குச் செல்வார்கள். தமிழகமுதல்வர் அணியினருக்கும், துணை முதல்வர் அணியினருக்கும் போட்டி நடைபெற்று வருகிறது. தமிழகத்தின் முதல்வராக வருவதற்கு ஓ.பன்னீர்செல்வம் முயற்சித்து வருகிறார். இவர்களது பிரச்னையால் இவர்களை இயக்கி வருபவர்களுக்கு பெரும் பிரச்னையாக இருந்து வருகிறது.
தமிழக சட்டப் பேரவை உறுப்பினர்கள் 70 பேரும், அமைச்சர்கள் 10 பேரும் அமமுகவுக்கு வருவதற்கு தயாராக உள்ளனர். தமிழக இடைத் தேர்தலில் அமமுக போட்டியிட்டு  நிச்சயமாக வெற்றி பெறும். 
தமிழகத்தில் நடைபெறும் ஆட்சி நிலையாக இருக்காது விரைவில் கவிழும்.
 குட்கா ஊழல் குறித்து பாமகவைச் சேர்ந்த அன்புமணி ராமதாஸ் பேசிவருவது தேவையில்லாதது. அமமுக இணைவது குறித்தோ அல்லது சேர்ப்பது குறித்தோ இதுவரை எந்த விதமான  பேச்சுவார்த்தைகளும் நடைபெறவில்லை. தமிழக முதல்வர் எடப்பாடி கே.பழனிசாமி, துணைமுதல்வர் ஓ.பன்னீர்செல்வம் வந்தாலும் ஏற்க மாட்டோம். தமிழக மக்களே அவர்களை ஏற்றுக் கொள்ள மாட்டார்கள் என்றார்.