மீனாட்சி சுந்தரேசுவரர் கோயில்களின் உண்டியல்  வருவாய் ரூ.72.91 லட்சம்

மதுரை மீனாட்சி சுந்தரேசுவரர் கோயில் மற்றும் அதன் உபகோயில்களின் உண்டியல்களில் பக்தர்கள் ஜூலை மாதம் ரூ.72.91 லட்சம் ரொக்கமாக காணிக்கை செலுத்தியுள்ளனர்.
மாதந்தோறும் மதுரை மீனாட்சி சுந்தரேசுவரர் கோயில் மற்றும் அதன் உபகோயில்களான தெப்பக்குளம் மாரியம்மன், முக்தீஸ்வரர், செல்லூர் திருவாப்புடையார், திருவாதவூர் திருமறைநாதர் உள்ளிட்டவற்றின் உண்டியல்கள் எண்ணப்பட்டு வருகின்றன. ஜூலை மாதத்துக்கான உண்டியல்கள் எண்ணிக்கை மீனாட்சி சுந்தரேசுவரர் கோயில் பழைய திருக்கல்யாண மண்டபத்தில் புதன்கிழமை நடைபெற்றது. 
இந்து சமய அறநிலையத்துறை உதவி ஆணையர் மு.ராமசாமி முன்னிலையில் நடைபெற்ற உண்டியல் எண்ணிக்கையில் மீனாட்சிசுந்தரேசுவரர் கோயில் தக்கார் பிரதிநிதி, கண்காணிப்பாளர்கள், பக்தர் பேரவையினர், ஐயப்ப சேவா சங்கத்தினர், கல்லூரி மாணவ, மாணவியர் மற்றும் கோயில் பணியாளர்கள் உள்ளிட்டோர் ஈடுபட்டனர்.
உண்டியல்களில் ரொக்கமாக ரூ.72லட்சத்து 91 ஆயிரத்து 162 பக்தர்களால் செலுத்தப்பட்டிருந்தது. தாலி உள்ளிட்ட தங்கப் பொருள்களாக 439 கிராமும், பல மாற்று வெள்ளி பொருள்களாக 811 கிராமும், பிரதமரைத் தகடுகளாக 1680 கிராமும் காணிக்கையாகச் செலுத்தப்பட்டிருந்தன. மேலும், பலமாற்றுப் பித்தளையாக 1,340 கிராமும் செலுத்தப்பட்டிருந்தது. உள்நாட்டு பக்தர்கள் மட்டுமல்லாது மலேசியா, சிங்கப்பூர், அமெரிக்கா, கனடா, இலங்கை போன்ற வெளிநாட்டு பக்தர்களும் உண்டியல்களில் தமது நாட்டு பணத்தை காணிக்கையாகச் செலுத்தியிருந்தனர். அதன்படி வெளிநாட்டு தாள்கள் 508  உண்டியல்களில்இருந்தன.