மின் கசிவால் வீட்டில் தீ விபத்து: பொருள்கள் எரிந்து சேதம்

தேனி மாவட்டம், கம்பத்தில் ஒரு வீட்டில் வெள்ளிக்கிழமை நள்ளிரவு மின் கசிவால் ஏற்பட்ட தீ விபத்தில் பொருள்கள் எரிந்து சேதமடைந்தன.

கம்பம் பாரதியாா்நகா் 4- ஆவது தெருவைச் சோ்ந்தவா் ரம்யா. தையல் தொழிலாளியான இவா், தனது இரு பெண் குழந்தைகளுடன் வசித்து வருகிறாா். இவரது கணவா் செல்வக்குமாா் பெரம்பலூரில் தையலராகப் பணியாற்றி வருகிறாா். இந்த நிலையில், ரம்யா தனது உறவினா்களுடன் வெள்ளிக்கிழமை இரவு திரையரங்கில் திரைப்படம் பாா்த்துவிட்டு வீட்டுக்குத் திரும்பினாா்.

கதவைத் திறந்த போது உள்ளிருந்து புகை வெளியேறுவதைக் கண்டு அதிா்ச்சியடைந்தாா். தகவலறிந்து அங்கு விரைந்து வந்த கம்பம் தீயணைப்பு நிலைய வீரா்கள் தீயை அணைக்கும் பணியில் ஈடுபட்டனா். தீயின் தீவிரம் காரணமாக உத்தமபாளையம் தீயணைப்பு நிலையத்திலிருந்தும் வீரா்கள் வரவழைக்கப்பட்டனா். இரு தீயணைப்பு நிலையங்களைச் சோ்ந்த வீரா்களும் இணைந்து தீயை அணைக்கும் பணியில் ஈடுபட்டனா்.

இதற்கிடையே, வீட்டுக்குள் இருந்த சமையல் எரிவாயு உருளை அதிக வெப்பம் காரணமாக வெடிக்கும் அபாயத்தில் இருந்தது தெரியவந்தது. இதனால் தீயை அணைக்கும் பணியில் சிரமம் ஏற்பட்டது. இதையடுத்து, தீயணைப்பு வீரா்கள் மிகுந்த பாதுகாப்புடன் அந்த சமையல் எரிவாயு உருளையை அங்கிருந்து அப்புறப்படுத்தினா். இதனால் அருகிலுள்ள வீடுகளுக்கும் தீ பரவுவது தடுக்கப்பட்டது குறிப்பிடத்தக்கது.

பிறகு பல மணி நேரம் போராடி தீயை தீயணைப்பு வீரா்கள் அணைத்தனா். மின்கசிவு காரணமாக இந்த தீ விபத்து ஏற்பட்டிருக்கலாம் என முதல் கட்ட விசாரணையில் தெரிவிக்கப்பட்டது.

தீ விபத்து ஏற்பட்ட வீட்டை தேனி மாவட்ட தீயணைப்புத் துறை உதவி அலுவலா் குமரேசன் நேரில் பாா்வையிட்டு ஆய்வு செய்தாா். இந்த தீ விபத்தில் வீட்டிலிருந்த ரூ.50 ஆயிரம் ரொக்கம், தங்கக் காதணி, கொலுசு உள்ளிட்ட சுமாா் ஒரு பவுன் மதிப்பிலான நகைகளும், சான்றிதழ்களும் சேதமடைந்ததாக ரம்யா தெரிவித்தாா்.