தேசிய கராத்தே, யோகாசனப் போட்டிகளில் தங்கம், வெள்ளிப் பதக்கங்களை வென்ற கம்பம் மாணவா்கள்

சென்னையில் நடைபெற்ற தேசிய அளவிலான கராத்தே, யோகாசனப் போட்டிகளில் 12 தங்கப் பதக்கங்களையும், 2 வெள்ளிப் பதக்கங்களையும் வென்ற கம்பத்தைச் சோ்ந்த மாணவ, மாணவிகளுக்கு பாராட்டு தெரிவிக்கப்பட்டது.

சென்னையில் உள்ள தமிழ்நாடு உடல் கல்வி, விளையாட்டு பல்கலைக்கழகத்தில் மிஷன் ஒலிம்பிக் கேம்ஸ் அசோசியேஷன் இந்தியா சாா்பில் தேசிய அளவிலான கராத்தே, யோகாசனப் போட்டிகள் வெள்ளிக்கிழமை நடைபெற்றன. இதில் கம்பம் தி மாஸ்டா் ஸ்போா்ட்ஸ் அகாதெமி ஆஃப் தமிழ்நாடு மாணவ, மாணவிகள் பங்கேற்றனா்.

இதில், கராத்தே போட்டியில் 4 தங்கப் பதக்கங்களையும், 2 வெள்ளிப் பதக்கங்களையும், யோகாசனப் போட்டியில் 8 தங்கப் பதக்கங்களையும் இந்த மாணவ, மாணவிகள் வென்றனா்.

யோகாசனப் போட்டியில் 7 வயது பிரிவில் மா. ஹா்சன், 12 வயது பிரிவில் க. சுசியந்த், 12 வயது பிரிவில் தி. நஷ்வந்த், 11 வயது பிரிவில் தி. தரணிதரண், 13 வயது பிரிவில் ஆா். ஹா்ஷவா்த்தன், 17 வயது பிரிவில் கு. அட்சயா, 18 வயது பிரிவில் கு. தீட்சனா, 60 வயதுக்கு மேற்பட்டோா் பிரிவில் ஓய்வுபெற்ற வங்கி ஊழியா் பா. நாகேஷ் ஆகியோா் தங்கப் பதக்கங்களை வென்றனா்.

கராத்தே போட்டியில் 10 வயது பிரிவில் ஜெ. தீனகிருஷ்ணன், 12 வயது பிரிவில் தி. நஷ்வந்த், 13 வயது பிரிவில் ஆா். ஹா்ஷவா்த்தன், 17 வயது பிரிவில் கு. அட்சயா ஆகியோா் கட்டா பிரிவில் தங்கப் பதக்கங்களையும், 11 வயது பிரிவில் தி. தரணிதரண், 18 வயது பிரிவில் கு. தீட்சனா ஆகியோா் வெள்ளிப் பதக்கங்களையும் பெற்றனா்.

இந்த மாணவ, மாணவிகளையும், இவா்களுக்கு பயிற்சி அளித்த தி மாஸ்டா் ஸ்போா்ட்ஸ் அகாதெமியின் நிறுவனரும், மாநில தலைமைப் பயிற்சியாளருமான கராத்தே கே.எஸ்.கே. ராமகிருஷ்ணனையும் பெற்றோா், பொதுமக்கள், சமூக ஆா்வலா்கள் பாராட்டினா்.