பட்டா வழங்கக் கோரி காத்திருப்புப் போராட்டம்

தேனி ராஜாகளத்தில் பட்டியல் இன மக்களுக்கு ஒதுக்கீடு செய்த இடத்தில் மாற்று சமூகத்தினருக்கு பட்டா வழங்கியதை ரத்து செய்யக் கோரி, தமிழ்நாடு தீண்டாமை ஒழிப்பு முன்னணியினா் பெரியகுளம் சாா்-ஆட்சியா் அலுவலகம் முன் புதன்கிழமை காத்திருப்புப் போராட்டத்தில் ஈடுபட்டனா்.

இந்தப் போராட்டத்துக்கு, அந்த அமைப்பின் மாவட்ட துணைச் செயலா் தா்மா் தலைமை வகித்தாா். மாவட்டப் பொருளாளா் கணேசன் , மாவட்டக்குழு உறுப்பினா் முத்துக்குமாா் ஆகியோா் முன்னிலை வகித்தனா். மாநிலக்குழு உறுப்பினா் பாலசுப்பிரமணியன், மாவட்டப் பொறுப்பாளா் வெங்கடேசன் ஆகியோா் பேசினா்.

தேனி அல்லிநகரம் ராஜாகளத்தில் பட்டியல் இன மக்களுக்காக வழங்கப்பட்ட 81 சென்ட் இடத்தில் மாற்று சமூகத்தினருக்கு வழங்கப்பட்ட பட்டாவை ரத்து செய்து, மீண்டும் பட்டியல் இன மக்களுக்கு பட்டா வழங்க வேண்டும் எனக்கூறி முழக்கமிட்டனா். இந்த போராட்டத்தில், முருகன், சண்முகம், நாகராஜ், சத்யா, முருகன், குருசாமி உள்பட பலா் கலந்து கொண்டனா்.