சிவகாசியில் 73 இடங்களில் விநாயகர் சிலைகள்

சிவகாசியில் இந்து அமைப்பினர் சார்பில் 73 இடங்களில் விநாயகர் சிலைகள் வியாழக்கிழமை அமைக்கப்பட்டு வழிபாடுகள் நடத்தப்பட்டது.
சிவகாசியில் இந்து அமைப்புக்கள் சார்பில் சிவகாசி நகர் காவல் நிலைய எல்லைப் பகுதியில் 23 சிலைகளும், சிவகாசி கிழக்கு காவல் நிலைய எல்லைப் பகுதியில் 27 சிலைகளும், மாரனேரி காவல் நிலைய எல்லைப் பகுதியில் 9 சிலைகளும், திருத்தங்கல் காவல் நிலைய எல்லைப் பகுதியில் 8 சிலைகளும், எம்.புதுப்பட்டி காவல் நிலைய எல்லைக்குள் 6 சிலைகளும் அமைக்கப்பட்டு வழிபாடு நடத்தப்பட்டது.
இதைத் தொடந்து வியாழக்கிழமை அச்சிலைகளுக்கு அருகம்புல் மாலை அமைக்கப்பட்டு, தீபாராதனைகள் நடைபெற்றன. பக்தர்களுக்கு பொங்கல் உள்ளிட்டவை பிரசாதமாக வழங்கப்பட்டது. இந்த சிலைகள் வரும் 16 ஆம் தேதி ஊர்வலமாக எடுத்து செல்லப்பட்டு கரைக்கப்பட உள்ளது.
இந்நிலையில் சிவகாசி 
காவல் கண்காணிப்பாளர் தி.பிரபாகரன் சிலை அமைப்பாளர்களுக்கு விடுத்துள்ள சுற்றிக்கையில், காலை மற்றும் மாலைவேளைகளில் இரண்டு மணிநேரத்திற்கு மட்டுமே பூஜைக்காக ஒலிபெருக்கியை பயன்படுத்த வேண்டும். சிலை அமைப்பாளர்கள் சிலைகளின் பாதுகாப்பிற்கு ஆள்களை நியமித்துக் கொள்ள வேண்டும். 
சிலைகளை கரைக்க ஊர்வலமாக செல்லும் போது,காவல்துறையால் அனுமதிக்கப்பட்டுள்ள வழிதடங்களில் மட்டுமே செல்ல வேண்டும். ஊர்வலத்தின் போது பட்டாசு வெடிக்க கூடாது என அதில் தெரிவிக்கப்பட்டுள்ளது.