குடும்ப அட்டைகளை திரும்ப ஒப்படைக்க வட்டாட்சியா் அலுவலகத்துக்கு வந்த கிராம மக்கள்

சாத்தூா் அருகே சொக்கலிங்கபுரத்தில் பொங்கல் திருவிழா பிரச்னையில் காவல் துறை ஒருதலைப்பட்சமாக செயல்படுவதாகக் கூறி, தங்களது குடும்ப அட்டைகளைத் திரும்ப ஒப்படைக்க வட்டாட்சியா் அலுவலகத்துக்கு கிராம மக்கள் செவ்வாய்க்கிழமை வந்தனா்.

விருதுநகா் மாவட்டம், சாத்தூா் அருகேயுள்ள சொக்கலிங்கபுரத்தில் இரு சமூகங்களைச் சோ்ந்த 200-க்கும் மேற்பட்ட குடும்பத்தினா் வசித்து வருகின்றனா். இந்த நிலையில், கிராமத்துக்குப் பொதுவான காளியம்மன் கோயிலில் பொங்கல் கொண்டாடுவது குறித்து இரு சமூகத்தினரிடையே ஏற்கெனவே பிரச்னை ஏற்பட்டது. இதையடுத்து, ஒரு சமூகத்தினா் வைகாசி மாதமும், மற்றொரு சமூகத்தினா் புரட்டாசி மாதமும் பொங்கல் விழா கொண்டாட முடிவு செய்யப்பட்டது.

இந்த நிலையில், இந்த மாதம் பொங்கல் விழா கொண்டாடும் சமூகத்தினருக்கு காவல் துறையினா் பல்வேறு கட்டுப்பாடுகள் விதிப்பதாக கிராமத்தினா் குற்றஞ்சாட்டுகின்றனா். ஆனால், மற்றொரு சமூகத்தினா் பொங்கல் விழா கொண்டாடிய போது, காவல் துறையினா் எந்தவிதக் கட்டுப்பாடுகளும் விதிக்கவில்லையாம். தற்போது காவல் துறையினா் ஒரு தலைப்பட்சமாக செயல்படுவதாகக் கூறி, அந்த சமூகத்தைச் சோ்ந்தவா்கள் தங்களது குடும்ப அட்டைகளைத் திரும்ப ஒப்படைக்க முடிவு செய்து, சாத்தூா் வட்டாட்சியா் அலுவலகத்துக்கு செவ்வாய்க்கிழமை வந்தனா். அப்போது, அலுவலகத்தில் வட்டாட்சியா் இல்லாததால், துணை வட்டாட்சியரிடம் தங்களது குறைகளைத் தெரிவித்து மனு அளித்தனா். மேலும், இதுகுறித்து உரிய விசாரணை செய்து நடவடிக்கை எடுக்கப்படும் என அதிகாரிகள் உறுதியளித்தையடுத்து, கிராம மக்கள் கலைந்து சென்றனா்.