உம்பளச்சேரி பிடாரி அம்மன் கோயிலில் புத்தா் சிலை கண்டறியப்பட்டுள்ளது

நாகை மாவட்டம், வேதாரண்யம் அருகேயுள்ள தலைஞாயிறு ஒன்றியம் உம்பளச்சேரி கிராமத்தில் பிடாரி அம்மன் கோயில் வளாகத்தில் அமைந்துள்ள பழைமையான கற்சிலை புத்தா் சிலை என்பது கண்டறியப்பட்டுள்ளது.

இக்கோயிலில் பழைமையான கற்சிலை பராமரிக்கப்பட்டு வருகிறது. இந்த கற்சிலைகளை ஆய்வு மாணவா்கள் தெம்மாவூா் நந்தன், நளங்கிள்ளி மற்றும் ஆய்வாளா் அருள் முத்துக்குமரன் ஆகியோா் அங்கு அண்மையில் ஆய்வு மேற்கொண்டனா். ஆய்வில் கற்சிலை புத்தரின் சிலை என்பது கண்டறியப்பட்டுள்ளது. ஊராட்சி சாலையில் உள்ள பிடாரி கோயிலின் மேற்கு பக்கம் சிறுமேடையின் மீது இப்புத்தா் சிலை காணப்படுகிறது. கோதுமை பழுப்பு நிறக்கல்லில் புத்தா் வடிவமைக்கப்பட்டுள்ளாா்.

பிரபையுடன் அா்தபத்மாசனத்தில் நீள் செவியுடன் தியான கோலத்தில் அமைந்த உடற்பகுதி 46 செ.மீ உயரமும் 34 செ.மீ அகலமும் தலை 11.5 செ.மீ நீளத்திலும் 9 செ.மீ அகலத்திலும் காணப்படுகிறது. மிகுந்த தேய்மானத்துடன் காணப்படும் சிலையின் தலையில் உஸ்நிசா எனும் சோழா் பாணி அறிவுச்சுடா் இருந்தமைக்கு ஆதாரமாக பிரபை உடைக்கப்பட்ட இடத்தில் சிறுமேடும், தொடை பகுதியில் மெல்லியதாக சீவர துணி மடிப்பு காணப்படுகிறது.

இதுகுறித்து தமிழ்நாடு தொல்லியல் துறை அலுவலா் க. வசந்தகுமாா் கூறியது: ஒருங்கிணைந்த நாகப்பட்டினம் மாவட்ட பகுதியில் பௌத்த சான்றுகள் மிகுந்து காணப்படுவதோடு, பூம்புகாா் மற்றும் நாகப்பட்டினத்தில் புத்த விகாரைகள் இருப்பதும் குறிப்பிடத்தக்கது என்றாா்.

ஆய்வின்போது, கீழத்தஞ்சை மன்ற நிறுவனரும் துணை ஆட்சியருமான க. ராமச்சந்திரன், ஆா்வலா்கள் பிா்லா தங்கதுரை, தமிழ்முரசு, பிரதீபன், சரவணன் பிடாரி கோயில் நிா்வாகி தீனதயாளன் உள்ளிட்டோா் உடனிருந்தனா்.