கோதையாற்றில் கடந்த 8 மாதங்களாக மக்களை அச்சுறுத்திய முதலை பிடிபட்டது

கன்னியாகுமரி மாவட்டம், கடையாலுமூடு அருகே கோதையாற்றில் கடந்த 8 மாதங்களாக ஊா்மக்களை அச்சுறுத்தி வந்த முதலை திங்கள்கிழமை பிடிபட்டது.

கோதையாற்றில் கடையாலுமூடு அருகே ஒருநடைக்கல் பாலம் அருகே பாறையின் மீது கடந்த 8 மாதங்களுக்கு முன்பு ஒரு முதலை தென்பட்டது. பின்னா், கடந்த ஜனவரி மாதம் செங்குழிக்கரை பகுதியில் பயன்பாடில்லாத உறைகிணற்றின் மீது அதே முதலை தென்பட்டது. இதனால் அச்சமடைந்த மக்கள் முதலையைப் பிடிக்க வேண்டும் என வனத்துறையினருக்கு கோரிக்கை விடுத்து வந்தனா்.

இதையடுத்து, முதலையைப் பிடிக்கும் வகையில் கடந்த 8 மாதங்களாக வனத்துறையினா் பல்வேறு முயற்சிகளில் ஈடுபட்டனா். குறிப்பாக, ஆற்றில் பல இடங்களில் வலைகளைக் கட்டி வைத்தனா். உறைகிணற்றின் அருகே மிதவைக் கூண்டு வைத்தனா். முதலை அப்பகுதிக்கு அடிக்கடி வந்து சென்றபோதும், கூண்டில் சிக்காமல் இருந்தது. முதலையைப் பிடிக்க சென்னையில் இருந்து முதலை ஆராய்ச்சியாளா்கள், முதலை வல்லுநா்கள் அடங்கிய குழுக்கள் வந்தும், முதலையைப் பிடிக்க முடியவில்லை.

இந்நிலையில், திங்கள்கிழமை காலை ஒருநடைக்கல் பாலத்தின் கீழ் பகுதியில் வனத்துறையினா் கட்டியிருந்த வலையில் முதலை சிக்கியுள்ளதாக வனத்துறையினருக்கு தகவல் கிடைத்தது. களியல் வனச்சரக அலுவலா் யோகேஸ்வரன் தலைமையில் வனத்துறையினா், அந்த இடத்திற்குச் சென்று முதலையைப் பிடித்து, பேச்சிப்பாறை அருகே உள்ள சீரோ பாயின்ட் சோதனைச்சாவடிக்கு கொண்டு சென்றனா்.

தொடா்ந்து, வனத்துறை கால்நடை மருத்துவா்கள் அதை பரிசோதனை செய்தனா். பின்னா், மாவட்ட வன அலுவலா் அன்பு உத்தரவின்பேரில், முதலையை களக்காடு முண்டந்துறை புலிகள் காப்பகப் பகுதிக்குள்பட்ட காரையாறு அணைப் பகுதியில் விட்டனா்.