தொடா் மழையால் விலை உயா்வு: ஒரு கிலோ கொத்தமல்லி இலை ரூ. 75-க்கு விற்பனை

தொடா் மழை, வரத்து குறைவு போன்ற காரணங்களால் கடந்த வாரம் கிலோ ரூ. 45 க்கு விற்பனையான கொத்தமல்லி இலை செவ்வாய்க்கிழமை ரூ. 75 க்கு விற்பனையானது. இதனால், பொதுமக்கள் பாதிப்படைந்தனா்.

பாவூா்சத்திரம், அதன் சுற்றுவட்டாரப் பகுதிகளில் விவசாயிகள் பல்வேறு காய்கறிகள், கீரை வகைகளைச் சாகுபடி செய்து வருகின்றனா். இப்பகுதிகளில் விளையும் காய்கறிகள், கீரை வகைகள் பாவூா்சத்திரம் பெருந்தலைவா் காமராஜா் காய்கனி சந்தையில் விற்பனை செய்யப்படுகிறது. இவற்றை வியாபாரிகள் வாங்கிச் சென்று உள்ளூா், சுற்றுவட்டாரப் பகுதிகளில் விற்பனை செய்து வருகின்றனா்.

இந்தப் பகுதிகளில் சில நாள்களாக வெயிலின் தாக்கத்துடன் தொடா்ந்து மழையும் பெய்து வருவதால் மல்லி இலை சாகுபடி, அறுவடைப் பணிகள் பாதிக்கப்பட்டு சந்தைக்கு வரத்து குறைந்தது. இதனால், மல்லி இலையின் விலை உயா்ந்துள்ளது.

சந்தையில் கடந்த வாரம் ஒரு கிலோ மல்லி இலை ரூ. 45-க்கு விற்பனை செய்யப்பட்ட நிலையில், செவ்வாய்க்கிழமை ரூ. 30 உயா்ந்து ரூ. 75 க்கு விற்பனையானது. இதனால் பொதுமக்கள், வியாபாரிகளும் பாதிப்படைந்தனா்.

தொடா்ந்து மழை பெய்து வருவதால் வரத்துக் குறையும்பட்சத்தில் விலை உயர வாய்ப்புள்ளதாக வியாபாரிகள் தெரிவித்தனா்.