விநாயகர் ஊர்வலத்துக்கு ஆலோசனை

சிலை ஊர்வலத்தின்போது அனுமதிக்கப்பட்ட நீர்நிலைகளில் மட்டுமே விநாயகர் சிலைகளை கரைக்க வேண்டும் என்றார் மாவட்ட கூடுதல் காவல் கண்காணிப்பாளர் பாஸ்கரன்.  
கரூர் மாவட்டத்தில் விநாயகர் சதூர்த்தி ஊர்வலம் நடைபெற உள்ளதை முன்னிட்டு சிலை அமைப்பாளர்களுடன் காவல்துறை அதிகாரிகள் கலந்தாலோசனைக்கூட்டம் புதன்கிழமை மாவட்ட காவல் கண்காணிப்பாளர் அலுவலகத்தில் நடைபெற்றது. கூட்டத்திற்கு தலைமை வகித்து மாவட்ட கூடுதல் காவல் கண்காணிப்பாளர் எம். பாஸ்கரன் பேசுகையில், நீதிமன்ற உத்தரவின்படி சிலைகளை கரைக்க ஊர்வலமாக எடுத்துச் செல்லும்போது அமைதியைக் கடைப்பிடிக்க வேண்டும். களிமண்ணால் ஆன, ரசாயன கலவை பூசப்படாத சிலைகள் மட்டுமே  கரைக்க அனுமதிக்கப்படும். ஏற்கெனவே சிலைகள் கரைக்கலாம் என கண்டறியப்பட்ட இடங்களைத் தவிர மற்ற இடங்களில் கரைக்க அனுமதி கிடையாது என்றார் அவர். 
கூட்டத்தில் கூடுதல் காவல் கண்காணிப்பாளர் (மதுவிலிக்கு) சி. பாரதி, துணைக் கண்காணிப்பாளர்கள் எம். கும்மராஜா, ஆர்.முத்துச்செல்வன், என். சுகுமார் மற்றும் இந்து அமைப்பைச் சார்ந்தோர்,  சிலை அமைக்கும் அமைப்பாளர்கள் உள்ளிட்டோர் பங்கேற்றனர்.