புதுகையில் ஓய்வூதியா்கள் முழக்கப் போராட்டம்

பழைய ஓய்வூதியத் திட்டத்தை மீண்டும் அமல்படுத்த வேண்டும் என்பன உள்ளிட்ட கோரிக்கைகளை வலியுறுத்தி புதுக்கோட்டையில் செவ்வாய்க்கிழமை அனைத்திந்திய மாநில அரசு ஓய்வூதியா் கூட்டமைப்பு சாா்பில் முழக்கப் போராட்டம் நடைபெற்றது.

புதுக்கோட்டை மாவட்ட ஆட்சியா் அலுவலகம் அருகே நடைபெற்ற போராட்டத்துக்கு, கூட்டமைப்பின் மாவட்டத் தலைவா் மு. முத்தையா தலைமை வகித்தாா்.

மாவட்டச் செயலா் நீல ராமச்சந்திரன், எல்ஐசி ஓய்வூதியா் சங்க நிா்வாகி எம். அசோகன், அரசு ஊழியா் சங்க மாவட்டத் தலைவா் எஸ். ஜபருல்லா, அரசுப் போக்குவரத்துக் கழக ஓய்வூதியா் சங்க மண்டலப் பொதுச் செயலா் பி. லோகநாதன் உள்ளிட்டோா் கோரிக்கைகளை விளக்கிப் பேசினா்.

போராட்டத்தில் வலியுறுத்தப்பட்ட கோரிக்கைகள்:

குறைந்தபட்ச ஓய்வூதியத்தை ரூ.7,850 ஆக உயா்த்த வேண்டும். அனைத்து ஓய்வூதியத் திட்டங்களையும் ரத்து செய்துவிட்டு, பழைய ஓய்வூதியத் திட்டத்தையே அமல்படுத்த வேண்டும். அகவிலைப்படி நிலுவைத் தொகையை விரைவாக வழங்க வேண்டும்.

8-ஆவது ஊதியக் குழுப் பரிந்துரைகள் தாமதமாவதால், இடைக்கால நிவாரணம் வழங்க வேண்டும். ரயில் மற்றும் விமானங்களில் மூத்த குடிமக்களுக்கான கட்டணச் சலுகையை மீண்டும் வழங்க வேண்டும். மாநிலம் முழுவதும் பேருந்துகளில் இலவசப் பயணம் மேற்கொள்ளும் வகையில் பயண அட்டை வழங்க வேண்டும் என்பன உள்ளிட்ட 12 அம்சக் கோரிக்கைகளை வலியுறுத்தி முழக்கங்கள் எழுப்பப்பட்டன.