ஆடுதுறையில் மழைநீா் வடிகால் சீரமைப்புப் பணி: மறியல் ரத்து

தஞ்சாவூா் மாவட்டம், ஆடுதுறையில் சென்னை-கன்னியாகுமரி தொழில்வட சாலைத் துறையினா் சீரமைப்புப் பணிகளை வெள்ளிக்கிழமை தொடங்கினா். இதனால் சனிக்கிழமைக்கு அறிவிக்கப்பட்ட சாலை மறியல் போராட்டம் ரத்து செய்யப்பட்டது.

ஆடுதுறை பேருந்து நிலையம் முதல் முருகன் கோயில் வரை மழைநீா் வடிகால்கள் சேதமடைந்தது. இதேபோல் கே.ஜி.எஸ். பள்ளி செல்லும் சாலையும் பழுதடைந்திருந்தது. நீண்டகாலமாக சீரமைக்காதலால் பொதுமக்கள் ஆடுதுறை பேரூராட்சித் தலைவா் ம.க. ஸ்டாலின் தலைமையில் இரு முறை போராட்ட அறிவிப்பு செய்த நிலையில் நடந்த சமாதான பேச்சால் போராட்டத்தை கைவிட்டனா். இந்நிலையில் மூன்றாம் முறையாக சனிக்கிழமை சாலை மறியல் போராட்டம் மற்றும் தொழில்வட சாலைத் துறை அலுவலகத்தை பூட்டு போடும் போராட்டத்தை அறிவித்தனா்.

இதையடுத்து சென்னை - கன்னியாகுமரி தொழில் வடசாலைத் துறையினா் ஆடுதுறை முருகன் கோயிலிலிருந்து மழைநீா் வடிகால் வாய்க்காலை கட்டத் தொடங்கினா். விரைவில் பள்ளிச் சாலையை சீரமைப்பதாகவும் தெரிவித்தனா். இதனால் சனிக்கிழமைக்கு அறிவித்த சாலை மறியல் போராட்டத்தை கைவிட்டனா்.