ராமேசுவரம் - கும்பகோணம் இடையே பகல் நேரத்தில் விரைவு ரயில் இயக்க வலியுறுத்தல்

ராமேசுவரம் - கும்பகோணம் இடையே பகல் நேரத்தில் விரைவு ரயில் இயக்க மாவட்ட ரயில் உபயோகிப்பாளா் சங்கத்தினா் வலியுறுத்தியுள்ளனா்.

கும்பகோணத்தில் ஞாயிற்றுக்கிழமை மாலை அந்தச் சங்கத்தின் 63-வது ஆண்டு நிறைவு பொதுக்குழு கூட்டம் நடைபெற்றது. கூட்டத்துக்கு சங்கத் தலைவா் எம்.எம். ஜமீல் தலைமை வகித்தாா்.

கூட்டத்தில் நிறைவேற்றப்பட்ட தீா்மானங்கள்:

ராமநாதபுரம், திருச்சி மற்றும் தஞ்சாவூா் வழியாக ராமேசுவரம் - கும்பகோணம் இடையே பகல் நேர இன்டா்சிட்டி விரைவு ரயில் இயக்க வேண்டும். தஞ்சாவூா் மாவட்டத்தில் நரசிங்கன்பேட்டை மற்றும் திட்டை இடையே உள்ள ஆடுதுறை, திருவிடைமருதூா், திருநாகேசுவரம், கும்பகோணம், தாராசுரம், சுந்தரபெருமாள்கோவில், பண்டாரவாடை, அய்யம்பேட்டை, பசுபதிகோவில் உள்ளிட்ட ரயில் நிலையங்கள் நிறுவப்பட்டு, 2027 பிப்ரவரி மாதத்துடன் 150 ஆண்டுகள் நிறைவடைவதை சிறப்பாகக் கொண்டாட வேண்டும்.

தஞ்சாவூா் - விழுப்புரம் இடையே இரட்டை ரயில் பாதை திட்டத்துக்கு உடனடியாக ஒப்புதல் அளித்து, முதல்கட்டமாக தஞ்சாவூா் - மயிலாடுதுறை இடையிலான பணிகளை 2028-ல் நடைபெறவுள்ள மகாமகத் திருவிழாவுக்கு முன்னதாக முடிக்க வேண்டும் என்பது உள்ளிட்ட தீா்மானங்களை நிறைவேற்றி, மத்திய அரசுக்கு அனுப்ப முடிவு செய்யப்பட்டது.

புதிய நிா்வாகிகள் தோ்வு: சங்கத்தின் புதிய தலைவராக எம். மாறன், துணைத் தலைவராக டி. சரவணன், செயலராக ஏ. கிரி, பொருளாளராக எஸ். மோகன், இணைச்செயலா்களாக ஆா். நடராஜ் குமாா், ஆா். ரேவந்த் குமாா், ஊடக ஒருங்கிணைப்பாளா் தீபக் வசந்த், ஆகியோா் மற்ற நிா்வாகிகளாக தோ்ந்தெடுக்கப்பட்டனா். முன்னதாக ஈஸ்வா் சா்மா வரவேற்றாா். நிறைவில் டி. சரவணன் நன்றி கூறினாா்.