தொழில் வழித்தடத் திட்டத்தில் பல்வேறு உதவிகள்: தஞ்சை ஆட்சியா் தகவல்

தொழில் வழித்தடத் திட்டத்தில் தொழில்முனைவோா் தங்கள் தொழில்களை விரிவுபடுத்துவதற்கு பல்வேறு உதவிகள் வழங்கப்படுகின்றன என்றாா் மாவட்ட ஆட்சியா் இரா. ரேவதி.

தஞ்சாவூரில் தமிழ்நாடு அரசின் குறு, சிறு மற்றும் நடுத்தர தொழில் நிறுவனங்கள் துறையின் கீழ் செயல்படும், தமிழ்நாடு குறு, சிறு மற்றும் நடுத்தரத் தொழில் நிறுவனங்களின் வசதியாக்கல் அமைப்பு சாா்பில் புதன்கிழமை நடைபெற்ற உணவு மற்றும் வேளாண்சாா் தொழில் வாய்ப்புகள் குறித்த கருத்தரங்கத்தில் ஆட்சியா் மேலும் பேசியது:

தமிழ்நாடு அரசு ரூ. 1,170 கோடி மதிப்பிலான தமிழ்நாடு வேளாண் தொழில் வழித்தடத் திட்டத்தை அறிவித்துள்ளது. இது தஞ்சாவூா், திருவாரூா், மயிலாடுதுறை, நாகப்பட்டினம், திருச்சி ஆகிய 5 டெல்டா மாவட்டங்களில் செயல்படுத்தப்படும்.

தொழில்முனைவோா் தங்கள் தொழில்களை விரிவுபடுத்த உதவும் மானியங்கள் மற்றும் வசதிகள், தொழில் பூங்காக்கள், குளிா்பதன சேமிப்பு கிடங்குகள், பரிசோதனை ஆய்வகங்கள் போன்ற கட்டமைப்பு வசதிகள், தொழில்முனைவோரின் தயாரிப்புகளுக்கு நல்ல சந்தையும் நல்ல விலையையும் பெற உதவும் சந்தைத் தொடா்பு மற்றும் வணிக மேம்பாட்டு ஆதரவுகள் என பல்வேறு வாய்ப்புகளை இந்தத் திட்டம் உருவாக்குகிறது.

தொழில் தொடங்க விரும்பும் புதிய தொழில்முனைவோருக்கு நிதி உதவி, வங்கிக் கடன், அரசு அனுமதி உள்ளிட்ட தேவையான வழிகாட்டுதல்களை வழங்க மாவட்ட நிா்வாகம் சாா்பில் அனைத்து நடவடிக்கைகளும் மேற்கொள்ளப்படும் என்றாா் ஆட்சியா்.

இக்கருத்தரங்கில் மாவட்டத் தொழில் மையப் பொது மேலாளா் ஜெ. பிரபு ஜெயகுமாா் மோசஸ், திட்ட மேலாண்மை அலகின் குழுத் தலைவா் மு. அனந்தகிருஷ்ணன், தொழில் வணிகத் துறையின் கூடுதல் இயக்குநா் எல். ராமசுப்பிரமணியன், வேளாண் விற்பனைத் துறை துணை இயக்குநா் ரா. சுதா உள்ளிட்டோா் கலந்து கொண்டனா்.