கலையரங்கத்தில்  திருமண மண்டபம் திறப்பு

திருச்சி மத்தியப் பேருந்து நிலையம் அருகே கலையரங்கம் வளாகத்தில்  புதிய திருமண மண்டபத்தை மாவட்ட ஆட்சியர் கு.ராசாமணி புதன்கிழமை திறந்து வைத்தார். தொடர்ந்து செய்தியாளர்களிடம் அவர் கூறியது:
திருச்சியின் அடையாளமாகத் திகழ்ந்த கலையரங்கம் திரையரங்கமானது  தற்போது திருமண மண்டபமாக மாற்றி அமைக்கப்பட்டுள்ளது. முற்றிலும் குளிர்சாதன வசதியுடன் கூடிய இந்த திருமண மண்டபத்தில் 1,700 பேர் அமரக்கூடிய வசதி உள்ளது. மேலும் ஒரே நேரத்தில் 350 பேர் உணவு சாப்பிடலாம்.  புதன்கிழமை முதல் மக்கள் பயன்பாட்டுக்கு விடப்பட்டுள்ளது என்றார் ஆட்சியர் கு.ராசாமணி.
மாவட்ட நலப்பணிக் குழுப் பொருளாளர் சேவை கே.கோவிந்தராஜன், நிர்வாகக் குழு உறுப்பினர்கள் ஜெ.ஜெ.எல்.ஞானராஜ்,  வி.ஜெயபால்,  வாழ்நாள் உறுப்பினர்கள் ஆ.வ.ராஜகோபால்,  மருத்துவர் எம்.ஏ. அலீம், சிவானி கல்வி குழுமத் தலைவர் பி. செல்வராஜ், மாவட்ட நலப்பணிக்குழு உறுப்பினர் ரெ.சிங்காரம் உள்ளிட்டோர் பங்கேற்றனர்.