திருச்சி மத்திய சிறையில் கைதி உயிரிழப்பு

திருச்சி மத்திய சிறையில் அடைக்கப்பட்டிருந்த கைதி மயங்கிவிழுந்து உயிரிழந்தது குறித்து போலீஸாா் விசாரணை நடத்தி வருகின்றனா்.

திருச்சி ராம்ஜி நகா் மில் காலனியைச் சோ்ந்தவா் என். ஜெய் (எ) ஜானகிராமன் (47). இவா் மீது திருச்சி எடமலைபட்டிப்புதூா் காவல் நிலையத்தில் பதிவு செய்யப்பட்ட வழக்கில், கடந்த ஆகஸ்ட் 5-ஆம் தேதி கைது செய்யப்பட்டு திருச்சி மத்திய சிறையில் அடைக்கப்பட்டாா்.

இந்நிலையில், சிறையில் இருந்த ஜானகிராமன் ஞாயிற்றுக்கிழமை காலையில் திடீரென மயங்கி விழுந்தாா். இதையடுத்து, சிறை காவலா்கள் அவரை மீட்டு திருச்சி அரசு மருத்துவமனைக்கு அழைத்து சென்றனா். அங்கு அவரைப் பரிசோதனை செய்த மருத்துவா்கள், அவா் ஏற்கெனவே உயிரிழந்துவிட்டதாகத் தெரிவித்தனா்.

இதுகுறித்து திருச்சி கே.கே. நகா் காவல் நிலையத்தில் திருச்சி மத்திய சிறை அதிகாரி வெங்கட சுப்பிரமணி அளித்த புகாரின்பேரில், போலீஸாா் வழக்குப் பதிந்து விசாரணை நடத்தி வருகின்றனா்.