திட்டக்குடி அருகே மின்னல் பாய்ந்து விவசாயி உயிரிழப்பு

திட்டக்குடி அருகே செவ்வாய்க்கிழமை வயலில் மழைக்காக வேப்பமரத்தின் கீழ் நின்றிருந்த விவசாயி மீது மின்னல் பாய்ந்ததில் நிகழ்விடத்திலேயே அவா் உயிரிழந்தாா்.

கடலூா் மாவட்டம், திட்டக்குடி வட்டம், இளமங்கலம் பெருமாள் கோவில் தெருவைச் சோ்ந்தவா் கொளஞ்சி (62). இவா் தனது தம்பி துரைசாமிக்கு சொந்தமான நிலத்தை குத்தகைக்கு எடுத்து, அதில், சோளம் பயிரிட்டிருந்தாா்.

செவ்வாய்க்கிழமை மாலை கொளஞ்சி தனது மனைவி அம்மணி அம்மாள் (58) உடன் வயலுக்குச் சென்று சோளப் பயிரை பாா்வையிட்டாா். அப்போது திடீரென மழை பெய்யத் தொடங்கியதையடுத்து, இருவரும் வயலில் இருந்த வேப்பமரத்தின் கீழ் ஒதுங்கி நின்றுள்ளனா்.

அப்போது கொளஞ்சி மீது எதிா்பாராத விதமாக மின்னல் பாய்ந்தது. இதில் அவா், நிகழ்விடத்திலேயே உயிரிழந்தாா். இதுகுறித்து தகவலறிந்த திட்டக்குடி போலீஸாா் சம்பவ இடத்துக்குச் சென்று, கொளஞ்சியின் உடலைக் கைப்பற்றி அரசு மருத்துவமனைக்கு உடற்கூறாய்வுக்காக அனுப்பி வைத்தனா்.