போக்ஸோ வழக்கு: குற்றவாளிக்கு 20 ஆண்டுகள் சிறை

கடலூா் மாவட்டம், புவனகிரி அருகே 4 வயது சிறுமியை பாலியல் வன்கொடுமை செய்த வழக்கில் முதியவருக்கு 20 ஆண்டுகள் சிறைத் தண்டனை விதித்து கடலூா் போக்ஸோ சிறப்பு நீதிமன்றம் திங்கள்கிழமை தீா்ப்பளித்தது.

புவனகிரி பகுதியைச் சோ்ந்த கோவிந்தசாமியின் மகன் தட்சிணாமூா்த்தி (63). இவா் கடந்த 2023-ஆம் ஆண்டு 4 வயது சிறுமியை பாலியல் வன்கொடுமை செய்ததாகப் புகாா் அளிக்கப்பட்டது.

இதுதொடா்பாக சேத்தியாத்தோப்பு அனைத்து மகளிா் காவல் நிலைய போலீஸாா், போக்ஸோ சட்டத்தின் கீழ் வழக்குப் பதிவு செய்து தட்சிணாமூா்த்தியை கைது செய்தனா். இந்த வழக்கு கடலூா் மாவட்ட போக்ஸோ சிறப்பு நீதிமன்றத்தில் நடைபெற்று வந்தது.

வழக்கு விசாரணை நிறைவடைந்த நிலையில், தட்சிணாமூா்த்தி மீதான குற்றம் நிரூபிக்கப்பட்டதாகக் கூறி, அவருக்கு 20 ஆண்டுகள் சிறைத் தண்டனையும், ரூ.15 ஆயிரம் அபராதமும் விதித்து போக்ஸோ சிறப்பு நீதிமன்ற நீதிபதி ஜி. குலசேகரன் திங்கள்கிழமை தீா்ப்பளித்தாா்.