‘உங்களைத் தேடி உங்கள் ஊரில்’ திட்ட முகாம்: ஆட்சியா் கள ஆய்வு

கள்ளக்குறிச்சி மாவட்டம், கல்வராயன்மலை வட்டம், வெள்ளிமலை கிராமத்தில் ‘உங்களைத் தேடி உங்கள் ஊரில்’ திட்டத்தின் கீழ் அரசின் அனைத்து நலத் திட்டங்கள், சேவைகள் மற்றும் மக்களின் தேவைகள் குறித்து ஆட்சியா் ஜெ.இ.பத்மஜா நேரடி கள ஆய்வு மேற்கொண்டாா்.

இதையொட்டி, வெள்ளிமலை வனத் துறை அலுவலகம், கல்வராயன்மலை வட்டாட்சியா் அலுவலகம் ஆகியவற்றை ஆட்சியா் ஜெ.இ.பத்மஜா நேரில் பாா்வையிட்டு, அலுவலகத்தில் பராமரிக்கப்பட்டு வரும் பதிவேடுகள் உள்ளிட்ட பல்வேறு தகவல்கள் குறித்துக் கேட்டறிந்தாா். பின்னா், வெள்ளிமலை துணை சுகாதார நிலையத்தை நேரில் பாா்வையிட்டு, நோயாளிகளுக்கு வழங்கப்படும் சிகிச்சை முறைகள், மருந்துகளின் இருப்பு, சுற்றுப்புறத் தூய்மை குறித்து ஆய்வு செய்தாா். தொடா்ந்து, வெள்ளிமலை கால்நடை மருந்தகத்தை பாா்வையிட்டு, மருந்தகத்தின் செயல்பாடுகள் குறித்து ஆய்வு செய்தாா். ஏகலைவா மாதிரி உண்டு உறைவிட மேல்நிலைப் பள்ளியை நேரில் பாா்வையிட்டு, மாணவா்களின் கற்றல் திறன், வருகைப் பதிவேடு, மாணவா்களுக்கு வழங்கப்படும் உணவுப் பொருள்களின் தரம், குடிநீா் வசதி உள்ளிட்ட அடிப்படை வசதிகள் குறித்து கள ஆய்வு செய்தாா்.

பின்னா், வெள்ளிமலையில் உள்ள தமிழ்நாடு அரசு போக்குவரத்துக் கழக பேருந்து பணிமனை, வெள்ளிமலை நியாயவிலைக் கடை, வெள்ளிமலை கூட்டுறவு வங்கி அலுவலகம் ஆகியவற்றை நேரில் பாா்வையிட்டு, அங்கு பராமரிக்கப்படும் பதிவேடுகள், பணிகள், வருகை பதிவேடு உள்ளிட்ட பல்வேறு தகவல்கள் குறித்து சம்பந்தப்பட்ட அலுவலா்களிடம் கேட்டறிந்து ஆய்வு செய்தாா்.

இதையடுத்து கல்வராயன்மலை வட்டார வளா்ச்சி அலுவலகத்தில் ‘உங்களைத் தேடி உங்கள் ஊரில்’ திட்டத்தின் கீழ் கல்வராயன்மலை வட்டத்தில் கள ஆய்வு மேற்கொண்ட துறை அலுவலா்களுடன் ஆய்வுக் கூட்டம் ஆட்சியா் ஜெ.இ.பத்மஜா தலைமையில் நடைபெற்றது. இக் கூட்டத்தில் பொதுமக்களிடமிருந்து பல்வேறு கோரிக்கை மனுக்கள் பெறப்பட்டன. மேலும், கள ஆய்வின்போது கண்டறியப்பட்ட குடிநீா் வசதி, மின்விளக்கு வசதி, கூடுதல் கட்டட வசதி, கூடுதல் கழிவறை வசதிகள் ஏற்படுத்துதல் உள்ளிட்ட பல்வேறு கோரிக்கைகள் குறித்து விரிவாக ஆய்வு செய்யப்பட்டது. இந்த ஆய்வில் பள்ளிகளில் முறையாக தூய்மைப் பணிகளை மேற்கொள்ளுதல், பள்ளி இடைநிற்றலை தவிா்க்கவும், குடிநீா் பற்றாக்குறை உள்ள இடங்களை கண்டறிந்து உடனுக்குடன் நடவடிக்கை மேற்கொள்ளவும் சம்பந்தப்பட்ட அலுவலா்களுக்கு ஆட்சியா் அறிவுறுத்தினாா்.

இந்த ஆய்வின்போது மாவட்ட வருவாய் அலுவலா் ரா.ஜீவா, சமூக பாதுகாப்புத் திட்ட தனித்துணை ஆட்சியா் ஜி.சுமதி, மகளிா் திட்ட இயக்குநா் அ.லலிதா, மாவட்ட ஊரக வளா்ச்சி முகமை திட்ட இயக்குநா் கி.ரமேஷ்குமாா் மற்றும் சம்பந்தப்பட்ட அனைத்துத் துறை அலுவலா்கள் கலந்துகொண்டனா்.