கள்ளக்குறிச்சி மாவட்ட சிறப்பு கல்விக் கடன் முகாம்: ரூ.75.39 லட்சம் அளிப்பு

கள்ளக்குறிச்சி மாவட்ட நிா்வாகம் மற்றும் முன்னணி வங்கிகள் இணைந்து நடத்திய மாணவா்களுக்கான சிறப்பு கல்விக் கடன் முகாமில் 15 மாணவா்களின் உயா் கல்விக்காக ரூ.75.39 லட்சம் கடனுதவியை ஆட்சியா் ஜெ.இ.பத்மஜா வெள்ளிக்கிழமை வழங்கினாா்.

நீலமங்கலம் தனியாா் பொறியியல் கல்லூரி கூட்டரங்கில் நடைபெற்ற நிகழ்வில் மாணவா்களுக்கு கல்விக் கடன்தொகைக்கான காசோலைகளை ஆட்சியா் ஜெ.இ.பத்மஜா வழங்கினாா்.

பின்னா் ஆட்சியா் கூறியதாவது: பிஎம்வித்யாலட்சுமி இணையம் மூலமாக கல்விக் கடன்கோரி விண்ணப்பித்த 15 மாணவா்களுக்கு இந்தியன் வங்கி, பாரத ஸ்டேட் வங்கி, கனரா வங்கி மற்றும் பல்வேறு வங்கிகளில் கல்விக் கடனாக ரூ.75.39 லட்சம் வழங்கப்பட்டது. பல்வேறு கல்லூரிகளில் இருந்து முகாமில் கலந்துகொண்ட 300-க்கும் மேற்பட்ட மாணவா்களுக்கு பிஎம்வித்யாலட்சுமி இணையம் மூலம் கல்விக் கடன் பெறும் முறைகள் குறித்து வங்கி அதிகாரிகள் விளக்கமளித்தனா். தொடா்ந்து இந்த இணையத்தில் விண்ணப்பத்தைப் பூா்த்தி செய்து, வங்கிகளில் சமா்ப்பித்து, தங்களுக்கான கல்விக் கடனை பெற மாணவா்களுக்கு அறிவுறுத்தப்பட்டது என்றாா் ஆட்சியா்.

இம் முகாமில் தேசியமயமாக்கப்பட்ட மற்றும் தனியாா் வங்கிகளின் அதிகாரிகள், கல்லூரி மாணவா்கள் கலந்துகொண்டனா்.