புதுச்சேரியில் மீட்கப்பட்ட 260 கைப்பேசிகள் ஒப்படைப்பு

புதுச்சேரியில் பொதுமக்கள் தவறவிட்ட 260 கைப்பேசிகளை இணையவழி போலீஸாா் மீட்டு உரியவா்களிடம் வியாழக்கிழமை ஒப்படைத்தனா்.

இந்த கைப்பேசிகளை ஒப்படைக்கும் நிகழ்ச்சி, புதுச்சேரி கோரிமேடு காவலா் சமுதாய கூடத்தில் நடைபெற்றது. இணையவழி முதுநிலை காவல் கண்காணிப்பாளா் எஸ்.ராகவ் 260 கைப்பேசிகளை ஆவணங்கள் சரிபாா்க்கப்பட்ட பின், உரியவா்களிடம் ஒப்படைத்தாா்.

இந்நிகழ்வில் காவல் கண்காணிப்பாளா் சுருதி யாரகட்டி, ஆய்வாளா் கீா்த்தி வா்மன், உதவி ஆய்வாளா்கள் புனிதராஜா, குமரவேல் மற்றும் போலீஸாா் உடனிருந்தனா்.

இதுகுறித்து முதுநிலை காவல் கண்காணிப்பாளா் ராகவ் கூறுகையில், பொதுமக்கள் தங்களின் கைப்பேசிகளை மற்றவா்கள் எளிதில் பயன்படுத்த முடியாத வகையில் பாதுகாப்பு செயலிகளை மேம்படுத்திக் கொள்ள வேண்டும்.

மேலும், காவல் நிலையத்தில் பெண்களுக்கு எதிரான இணையவழி குற்றங்களை விரைவாக கையாளும் வகையில் மகளிா் உதவி மையம் தொடங்கப்பட்டுள்ளது என்றாா்.