ராயன் படத்திற்கு ஏ சான்றிதழ்?

நடிகர் தனுஷ் நடிப்பில் உருவான ராயன் படத்தின் சென்சார் குறித்து தகவல் வெளியாகியுள்ளது.

நடிகர் தனுஷின் 50ஆவது படத்தை அவரே எழுதி, இயக்கி, நடித்துள்ள ராயன் திரைப்படம் ஜூன் 13ஆம் தேதி வெளியிடப்படுவதாக இருந்த நிலையில், வெளியீட்டு தேதி ஜூலை 26 ஆம் தேதிக்கு மாற்றப்பட்டுள்ளது.

கேங்ஸ்டர் கதைக்களத்தில் உருவாகியுள்ள 'ராயன்' படத்துக்கு ஏ.ஆர். ரஹ்மான் இசையமைத்துள்ளார். இந்தத் திரைப்படத்தில் செல்வராகவன், எஸ்.ஜே.சூர்யா, பிரகாஷ் ராஜ், காளிதாஸ் ஜெயராம், சந்தீப் கிஷான், நடிகை துஷாரா விஜயன், நடிகை அபர்ணா பாலமுரளி, வரலட்சுமி சரத்குமார், சரவணன் உள்ளிட்டோர் நடித்துள்ளனர்.

முன்னதாக, இப்படத்தின் இசைவெளியீட்டு விழா சென்னையில் பிரம்மாண்டமாக நடைபெற்றது.

இந்த நிலையில், இப்படத்தில் அதிக வன்முறைக் காட்சிகள் மற்றும் கெட்ட வார்த்தைகள் இடம்பெற்றுள்ளதால் தணிக்கை வாரியம் படத்திற்கு ‘ஏ’ சான்றிதழ் வழங்கியுள்ளதாகக் கூறப்படுகிறது. வடசென்னையை மையமாகக் கொண்டு உருவான வடசென்னை திரைப்படமும் ‘ஏ’ சான்றிதழ் பெற்றிருந்தது குறிப்பிடத்தக்கது.