பல மாநிலங்களில் இன்று அரசு விடுமுறை

முன்னாள் பிரதமர் அடல் பிஹாரி வாஜ்பாயின் மறைவுக்கு இரங்கல் தெரிவிக்கும் வகையில், பல மாநிலங்களில் வெள்ளிக்கிழமை (ஆக.17) அரசு விடுமுறை அறிவிக்கப்பட்டுள்ளது.
உத்தரப் பிரதேசம், தில்லி, குஜராத், மத்தியப் பிரதேசம், ஒடிஸா, பஞ்சாப், பிகார், ஜார்க்கண்ட், ஹரியாணா, கேரளம், தமிழ்நாடு, கர்நாடகம், புதுச்சேரி உள்ளிட்ட மாநிலங்கள், வாஜ்பாய் மறைவை துக்க தினமாக அறிவித்துள்ளன. அரசு அலுவலகங்கள், பள்ளி, கல்லூரிகள் ஆகியவற்றுக்கு வெள்ளிக்கிழமை விடுமுறை விடப்படுவதாகவும் அந்த மாநிலங்கள் அறிவித்துள்ளன. இதேபோல், வாஜ்பாய் மறைவுக்கு இரங்கல் தெரிவிக்கும் வகையில், அரசு அலுவலகங்களில் இருக்கும் கொடிக் கம்பங்களில், அரைக் கம்பத்தில் தேசியக் கொடி பறக்கவிடப்பட்டிருக்கும் எனவும் அந்த மாநிலங்கள் அறிவித்துள்ளன.