கேரளம்: விமானத்தில் அவசர கால கதவை திறக்க முயன்ற பயணி மீது கொலை வழக்கு

கேரளத்தில் விமானத்தின் அவசர கால கதவை திறக்க முயன்ற பயணி மீது கொலை வழக்கு பதிவு செய்யப்பட்டுள்ளது.

கேரள மாநிலம், பாலக்காடு மாவட்டம், கூத்தனாதைச் சேர்ந்த ஜம்ஷீர் அதனிக்கல் கோலாலம்பூரிலிருந்து புதன்கிழமை கொச்சி வந்த விமானத்தில் பயணம் செய்தார். அப்போது அவர் விமானத்தின் அவசரக்கால வெளியேறும் கதவை வலுக்கட்டாயமாகத் திறக்க முயன்றதாகக் கூறப்படுகிறது.

அதோடு ஜன்னல் பலகையைச் சேதப்படுத்தி சக பயணிகளை மிரட்டி விமானத்தில் இருந்தவர்களின் பாதுகாப்பிற்கு அச்சுறுத்தல் ஏற்படுத்தியதாக புகார் எழுந்துள்ளது. உடனே விமானப் பணியாளர்கள் தலையிட்டு அவரைத் தடுத்து நிறுத்தியுள்ளனர்.

பின்னர் அந்த விமானம், விமான நிலையம் வந்தடைந்ததும் அவர் வியாழக்கிழமை கைது செய்யப்பட்டார். இதையடுத்து அவர் மீது கொலை முயற்சிப் பிரிவின் கீழ் போலீஸார் வழக்குப் பதிவு செய்துள்ளதாக அதிகாரிகள் சனிக்கிழமை தெரிவித்தனர்.

விசாரணையின் ஒரு பகுதியாக அவரிடம் விரிவாக விசாரணை நடத்தப்பட வேண்டும் என்று அதிகாரி ஒருவர் கூறினார். தொடர்ந்து அவரை திங்கள்கிழமை நீதிமன்றத்தில் ஆஜர்படுத்தி காவலில் எடுத்து விசாரணை மேற்கொள்ளவும் போலீஸார் முடிவு செய்துள்ளனர்.