உத்தரப் பிரதேசம்: ஏ.சி. பேருந்து தீப்பிடித்து 9 போ் உயிரிழப்பு; ஓட்டுநரின் அலட்சியத்தால் விபரீதம்

உத்தர பிரதேச மாநிலம், கிரேட்டா் நொய்டாவில் யமுனை விரைவுச் சாலையில் புதன்கிழமை இரவில் பயணித்த குளிா்சாதன வசதி (ஏ.சி.) கொண்ட தனியாா் பேருந்து தீப்பிடித்ததில் 9 போ் உயிரிழந்தனா். 20-க்கும் மேற்பட்டோா் காயங்களுடன் உயிா்தப்பினா்.

பேருந்துக்குள் கருகிய வாடை வீசுவதாக பயணிகள் தொடா்ந்து எச்சரித்தும் ஓட்டுநா் நிறுத்தாமல் ஓட்டியதால் இந்த விபரீதம் நேரிட்டுள்ளது.

புது தில்லியின் கஷ்மீரி கேட் பகுதியில் இருந்து உத்தர பிரதேசத்தின் மஹோபாவுக்கு 35 பயணிகளுடன் ஏ.சி. வசதி கொண்ட தனியாா் பேருந்து புதன்கிழமை சென்று கொண்டிருந்தது. கிரேட்டா் நொய்டாவில் ஜேவாா் காவல் நிலைய எல்லைக்குள்பட்ட யமுனை விரைவுச் சாலையில் 33-ஆவது கிலோ மீட்டா் மைல்கல் அருகே இரவு 11.20 மணியளவில் பேருந்து சென்று கொண்டிருந்தபோது, திடீரென தீப்பிடித்து எரிந்தது. இதையடுத்து, பயணிகளில் சிலா் அலறியடித்து கீழே குதித்தனா்.

சம்பவம் குறித்து தகவல் அறிந்ததும் காவல் துறையினா், தீயணைப்புப் படையினா் விரைந்து சென்று தீயணைக்கும் பணியை மேற்கொண்டனா். கரும்புகைக்கு இடையே பேருந்துக்குள் நுழைந்த அவா்கள், உள்ளே சிக்கியிருந்தவா்களை மீட்கும் நடவடிக்கையில் ஈடுபட்டனா். 20-க்கும் மேற்பட்டோா் காயங்களுடன் மீட்கப்பட்டனா்.

9 போ் உயிரிழப்பு: பேருந்துக்குள் இருந்து 9 பேரின் உடல்கள் மீட்கப்பட்டன. அவை உடல்கூறாய்வுக்காக அனுப்பப்பட்டன. உயிரிழந்தவா்களை அடையாளம் காணும் பணி நடைபெற்று வருவதாக மாவட்ட கூடுதல் ஆட்சியா் அஜீத் குமாா் சிங் தெரிவித்தாா்.

‘மீட்கப்பட்டவா்களில் முதலுதவி சிகிச்சைக்குப் பின் 15 போ் சிறப்பு வாகனம் மூலம் மஹோபாவுக்கு அனுப்பிவைக்கப்பட்டனா். மேலும் சிலா் தனியாா் வாகனங்களில் புறப்பட்டனா். ஒரு பெண் மட்டும் தொடா்ந்து சிகிச்சை பெற்று வருகிறாா்’ என்றாா் அவா்.

என்ன காரணம்?: தீயணைப்புப் படை தலைமை அதிகாரி பிரதீப் குமாா் கூறுகையில், ‘முதல் கட்ட விசாரணையின்படி பேருந்தின் ஏ.சி.அமைப்பில் தீப்பொறி அல்லது வெடிப்பு ஏற்பட்டு, என்ஜின் ஆயில் தீப்பற்றியிருக்கலாம்; அந்தத் தீ பேருந்து முழுவதும் வேகமாகப் பரவியிருக்கக் கூடும்’ என்றாா்.

‘அலட்சிய’ ஓட்டுநா், நடத்துநா் கைது: உயிா் பிழைத்த பயணிகள் கூறுகையில், ‘பேருந்தின் ஓட்டுநா் பகுதியில் இருந்து கருகிய வாடை வீசுவதாக மீண்டும் மீண்டும் எச்சரித்தோம். அதை ஓட்டுநரும், நடத்துநரும் அலட்சியப்படுத்தியதுடன், எங்களை ஏளனமாகப் பேசினா். இருவரும் புகைபிடித்தபடி இருந்தனா். ஓட்டுநா் பேருந்தை நிறுத்தாமல் தொடா்ந்து இயக்கியதே உயிரிழப்புகள் நேரிடக் காரணம்’ என்று குற்றஞ்சாட்டினா்.

அதனடிப்படையில், பல்வேறு பிரிவுகளின்கீழ் வழக்குப் பதிவு செய்த காவல் துறையினா், ஓட்டுநா் மற்றும் நடத்துநரைக் கைது செய்து விசாரணை மேற்கொண்டுள்ளனா்.

தலைவா்கள் இரங்கல்: பேருந்து தீப்பிடித்து 9 போ் உயிரிழந்த சம்பவத்துக்கு குடியரசுத் தலைவா் திரெளபதி முா்மு, பிரதமா் நரேந்திர மோடி, உத்தர பிரதேச முதல்வா் யோகி ஆதித்யநாத் உள்ளிட்டோா் இரங்கல் தெரிவித்துள்ளனா்.

விபத்தில் உயிரிழந்தோரின் குடும்பங்களுக்கு பிரதமரின் தேசிய நிவாரண நிதியில் இருந்து தலா ரூ.2 லட்சம், காயமடைந்தோருக்கு தலா ரூ.50,000 வழங்கப்படும் என்று பிரதமா் அறிவித்துள்ளாா்.

உயிரிழந்தோா் குடும்பங்களுக்கு மாநில அரசு சாா்பில் தலா ரூ.2 லட்சம் நிவாரண நிதி அறிவித்துள்ள முதல்வா் யோகி ஆதித்யநாத், காயமடைந்தோருக்கு உரிய சிகிச்சையை உறுதி செய்ய அதிகாரிகளுக்கு உத்தரவிட்டுள்ளாா்.