உலகக் கோப்பை ஹாக்கி: நெதர்லாந்திடம் வீழ்ந்த இந்தியா!

உலகக் கோப்பை ஹாக்கி தொடரின் 2-வது சுற்று ஆட்டத்தில் இந்திய ஆடவா் அணி, நெதர்லாந்திடம் தோல்வியைத் தழுவியது.

உலக கோப்பை ஹாக்கி தொடரின் 2-வது சுற்றில் இந்திய அணி தனது முதல் ஆட்டத்தில் ஒலிம்பிக் சாம்பியனான நெதர்லாந்து அணியை சனிக்கிழமை எதிர்கொண்டது. நெதா்லாந்தின் ஆம்ஸ்டெல்வீன் நகரில் நடைபெற்ற இந்த ஆட்டத்தில் முதல் இரண்டு குவாட்டர்களில் இரு அணிகளும் கோல் எதுவும் அடிக்கவில்லை.

இந்தநிலையில் ஆட்டத்தின் 41வது நிமிடத்தில் நெதர்லாந்து அணியின் வீரர் டுகோ டெல்கென்கேம்ப் முதல் ஃபீல்டு கோலைப் பதிவு செய்தார். தொடர்ந்து அந்த அணியின் வீரர்கள் ஜெப் ஹோட்மேக்கர்ஸ் 51வது நிமிடத்திலும், தைஜஸ் வான் டாம் 55வது நிமிடத்திலும் அடுத்தடுத்து ஃபீல்டு கோல்கள் அடிக்க நெதர்லாந்து 3-0 என்கிற கணக்கில் முன்னிலை வகித்தது.

இந்திய அணி தரப்பில், 52வது நிமிடத்தில் கிடைத்த பெனால்ட்டி காா்னா் வாய்ப்பைப் பயன்படுத்தி கேப்டன் ஹா்மன்பிரீத் சிங் ஒரே ஒரு கோல் மட்டும் அடித்தார். ஆனால் எஞ்சிய நேரத்தில் இந்தியாவுக்கு மேலும் கோல் வாய்ப்பு கிடைக்காமல் போக முடிவில் நெதர்லாந்து 3-1 கோல் கணக்கில் வென்றது.