அடுத்த 3 மணி நேரத்தில் உருவாகிறது முரசு புயல்! தீவிர புயலாக வலுவடையும்!

அடுத்த 3 மணி நேரத்தில் முரசு புயல் உருவாக வாய்ப்புள்ளதாக இந்திய வானிலை ஆய்வு மையம் தெரிவித்துள்ளது.

தெற்கு அந்தமான் கடலில் நிலவிய காற்றழுத்த தாழ்வுப் பகுதி (புயல் சின்னம்), மேற்கு-வடமேற்கு திசையில் நகர்ந்து தென்கிழக்கு வங்கக் கடல் மற்றும் அதையொட்டிய அந்தமான் கடலில் சனிக்கிழமை ஆழ்ந்த காற்றழுத்த தாழ்வுப் பகுதியாக வலுவடைந்தது.

இந்தப் புயல் சின்னம் மேலும் மேற்கு-வடமேற்கு திசையில் நகா்ந்து காற்றழுத்த தாழ்வு மண்டலமாக வலுப்பெற்றது. தொடர்ந்து, இந்தப் புயல் சின்னம் இன்று (நவ. 1) பிற்பகலில் புயலாக வலுப்பெறுகிறது.

இது தொடர்பாக, இந்திய வானிலை ஆய்வு மையத்தின் எக்ஸ் தளப் பதிவில் தெரிவித்திருப்பதாவது:

”தென்கிழக்கு வங்கக் கடலில் நிலைகொண்டிருந்த காற்றழுத்த தாழ்வு மண்டலம், கடந்த 6 மணி நேரத்தில் (காலை 9 மணி நிலவரப்படி) மணிக்கு 23 கி.மீ வேகத்தில் மேற்கு-வடமேற்கு திசையை நோக்கி நகர்ந்து, ஆழ்ந்த காற்றழுத்த தாழ்வு மண்டலமாக வலுவடைந்துள்ளது.

இந்தப் புயல் சின்னம் சென்னைக்கு (தமிழ்நாடு) கிழக்கே - தென்கிழக்கே சுமார் 700 கி.மீ. தொலைவிலும், விசாகப்பட்டினத்திற்கு (ஆந்திரப் பிரதேசம்) தெற்கே - தென்கிழக்கே 770 கி.மீ. தொலைவிலும், மசூலிப்பட்டினத்திற்கு (ஆந்திரப் பிரதேசம்) தென்கிழக்கே 770 கி.மீ. தொலைவிலும், ஒங்கோலுக்கு (ஆந்திரப் பிரதேசம்) கிழக்கே - தென்கிழக்கே 810 கி.மீ. தொலைவிலும் நிலை கொண்டுள்ளது.

இந்தப் புயல் சின்னம் தொடர்ந்து மேற்கு-வடமேற்கு திசையில் நகர்ந்து, அடுத்த 6 மணி நேரத்தில் (பிற்பகல் 3 மணிக்கு மேல்) தென்மேற்கு மற்றும் அதனை ஒட்டிய மேற்கு - மத்திய வங்கக் கடலில் புயலாக வலுவடையும்.

நாளை (நவ. 2) மேற்கு - மத்திய வங்கக் கடலில் தீவிர புயலாக மேலும் வலுவடையும் என்றும் எதிர்பார்க்கப்படுகிறது. தொடர்ந்து மேற்கு-வடமேற்கு திசையில் நகரும் இந்தப் புயல், நவ. 3 ஆம் தேதி காலை வாக்கில், நெல்லூருக்கும் நரசபூருக்கும் இடையே தெற்கு ஆந்திரப் பிரதேச கடற்கரையை கடக்கக்கூடும்.

அப்போது, மணிக்கு 100 முதல் 110 கி.மீ. வேகத்திலும், அவ்வப்போது 120 கி.மீ வேகத்திலும் காற்று வீசக்கூடும் என்றும் கணிக்கப்பட்டுள்ளது” என்று குறிப்பிடப்பட்டுள்ளது.