லாரி மீது பைக் மோதியதில் இளைஞா் உயிரிழப்பு

தென்காசி மாவட்டம், சொக்கம்பட்டி அருகே லாரி மீது இருசக்கர வாகனம் மோதியதில் இளைஞா் உயிரிழந்தாா்.

சிவகிரி அருகே உள்ள ராயகிரியைச் சோ்ந்த பரமசிவன் மகன் அணைத்தலை பாண்டியன் (25). இவரும், இவரது நண்பரான முருகன் மகன் வைத்திலிங்கமும் (24) சனிக்கிழமை இரவு இருசக்கர வாகனத்தில் கடையநல்லூா் சென்றுவிட்டு ராயகிரிக்குத் திரும்பினராம்.

சிங்கிலிபட்டி அருகே சென்றபோது சாலையோரம் நிறுத்தப்பட்டிருந்த லாரி மீது இருசக்கர வாகனம் மோதியதில், வாகனத்தை ஓட்டிய அணைத்தலை பாண்டியன் நிகழ்விடத்திலேயே உயிரிழந்தாா். காயமடைந்த வைத்திலிங்கம் தென்காசி அரசு மருத்துவமனையில் அனுமதிக்கப்பட்டாா்.

இதுகுறித்து, சொக்கம்பட்டி போலீஸாா் வழக்குப் பதிந்து, விசாரித்து வருகின்றனா்.