அச்சன்புதூரில் 130 கிலோ குட்கா பறிமுதல்: 2 போ் கைது

தென்காசி மாவட்டம் அச்சன்புதூா் பகுதியில் காரில் கடத்தி வரப்பட்ட 130 கிலோ குட்கா உள்ளிட்ட புகையிலைப் பொருள்களை தனிப்படை போலீஸாா் பறிமுதல் செய்து, 2 பேரை கைது செய்தனா்.

கா்நாடக மாநிலம் பெங்களூருவில் இருந்து புகையிலைப் பொருள்களை கடத்தி வந்து, அச்சன்புதூரில் உள்ள சிறு கடைகளுக்கு விற்பனை செய்து வருவதாக மாவட்ட காவல் கண்காணிப்பாளா் எஸ். அசோக்குமாருக்கு தகவல் கிடைத்தது.

அவரது உத்தரவின்பேரில், தனிப்படை போலீஸாா் அப்பகுதியில் தீவிர கண்காணிப்பில் ஈடுபட்டனா். அப்போது, அங்குள்ள பிள்ளையாா் கோயில் அருகே வந்த காரை, தனிப்படை உதவி ஆய்வாளா் கருப்பசாமி பாண்டியன் (தென்காசி)தலைமையிலான போலீஸாா் தடுத்து நிறுத்தி சோதனை செய்தனா்.

அந்த காரில் சுமாா் 130 கிலோ புகையிலைப் பொருள்கள் இருப்பது தெரியவந்தது. அவற்றைப் பறிமுதல் செய்து, காரில் இருந்த அச்சன்புதூா் மேலத்தெருவை சோ்ந்த கனியப்பா மகன் சாகுல் (42), மணக்காடு தெருவைச் சோ்ந்த சாகுல் ஹமீது மகன் தாஜுதீன் (45) ஆகியோரை போலீஸாா் கைது செய்தனா்.