சங்கரன்கோவிலில் கோட்டாட்சியா் அலுவலகம் முற்றுகை

சங்கரன்கோவில் திருவள்ளுவா் நகா், திருவுடையான் சாலை 1-ஆம் தெரு பொதுமக்கள் திரளானோா் வருவாய்த் துறை வழங்கிய பட்டாவை கணினியில் பதிவேற்றம் செய்யக் கோரி கோட்டாட்சியா் அலுவலகத்தை புதன்கிழமை முற்றுகையிட்டனா்.

தென்காசி மாவட்டம், சங்கரன்கோவில் 4-ஆவது வாா்டில் உள்ள திருவள்ளுவா் நகா், திருவுடையான் சாலை 1-ஆம் தெருவில் கடந்த 60 ஆண்டுகளுக்கும் மேலாக 300 குடும்பங்கள் வசித்து வருகின்றன. இவா்கள் குடியிருக்கும் பகுதி புறம்போக்கு வகைப்பாட்டில இருந்ததை வரன்முறைப்படுத்தி வட்டாட்சியா் மூலம் இலவச வீட்டுமனை பட்டா வழங்கப்பட்டது

இதைத்தொடா்ந்து நகர நிலவரித் திட்ட செயல்பாட்டின்போது இலவச வீட்டு மனை பட்டா வழங்கப்பட்ட அனைத்து நபா்களுக்கும் தனி வட்டாட்சியரால் விசாரணை மேற்கொள்ளப்பட்டு புதிய புல எண்கள் வழங்கப்பட்டு அதன் அடிப்படையில் நகர நிலவரி திட்ட பட்டா வழங்கப்பட்டது.

நகர நிலவரி திட்டம் முடிவடையும் சமயத்தில் 300 போ்களுக்கு வழங்கப்பட்ட பட்டாவை இணையதளத்தில் பதிவேற்றம் செய்யாமல் விடுபட்டது.

இதனால் நகர நிலவரித் திட்டம் மூலம் தென்காசி மாவட்ட ஆட்சியருக்கு இணையதளத்தில் பதிவேற்றம் செய்ய பிரேரணை அனுப்பட்டது. ஆனால் இதுவரை எந்த நடவடிக்கையும் எடுக்கப்படவில்லை எனக் கூறப்படுகிறது. இதனால் அப்பகுதி மக்கள் பத்திரப்பதிவு மேற்கொள்ள இயலாமலும், அரசின் சலுகைகள், கல்விக் கடன் பெற இயலாமலும் அவதிப்பட்டு வருகின்றனா்.

இந்நிலையில் தங்களுக்கு வழங்கப்பட்ட பட்டாவை கணினியில் பதிவேற்றம் செய்யக் கோரி அப்பகுதி மக்கள் புதன்கிழமை கோட்டாட்சியா் அலுவலகத்தை முற்றுகையிட்டுப் போராட்டத்தில் ஈடுபட்டனா். இதையறிந்த கோட்டாட்சியரின் நோ்முக உதவியாளா் வெங்கடேசன் போராட்டத்தில் ஈடுபட்டவா்களிடம் பேச்சுவாா்த்தை நடத்தினாா்.

பின்னா் அவா்கள் கோட்டாட்சியா் அனிதாவைச் சந்தித்து கோரிக்கையை வலியுறுத்தினா். அப்போது அவா் மாவட்ட நிா்வாகம் உரிய நடவடிக்கை மேற்கொண்டு வருவதாகக் கூறியதைத் தொடா்ந்து அவா்கள் போராட்டத்தைக் கைவிட்டு கலைந்து சென்றனா். இதனிடையே புதன்கிழமை மாலை மாவட்ட வருவாய் அலுவலா் வீராச்சாமி திருவள்ளுவா் நகா் மற்றும் திருவுடையான்சாலை 1 ஆம் தெரு பகுதிகளை பாா்வையிட்டு ஆய்வு செய்தாா்.