ரூ.4 லட்சம் செப்பு பொருள்கள் திருட்டு: 2 போ் கைது

ஸ்ரீபெரும்புதூா் அடுத்த செங்காடு பகுதியில் பகுதியில் இயங்கி வரும் தனியாா் தொழிற்சாலையில் ரூ. 4 லட்சம் செப்பு பொருள்கள் திருடிய ஊழியா்கள் 2 பேரை போலீஸாா் கைது செய்தனா்.

ஸ்ரீபெரும்புதுாா் அடுத்த செங்காடு பகுதியில் உதிரிபாகங்கள் உற்பத்தி செய்யும் தனியாா் தொழிற்சாலை இயங்கி வருகிறது. இந்த தொழிற்சாலையில், கடந்த ஆகஸ்டு மாதம் ரூ.4 லட்சம் மதிப்புள்ள 300 கிலோ செப்பு பொருள்கள் திருடு போனதாக, தொழிற்சாலை நிா்வாகத்தின் சாா்பில் ஸ்ரீபெரும்புதுாா் காவல் நிலையத்தில் புகாா் அளிக்கப்பட்டது. இந்த புகாரின் பேரில் ஸ்ரீபெரும்புதூா் போலீஸாா் வழக்குப் பதிவு செய்து விசாரித்து வந்தனா்.

தொழிற்சாலையில் பணிப்புரியும் புதுக்கோட்டை மாவட்டம், கொடிவயல் பகுதியை சோ்ந்த மதன் (23) திருவள்ளூா் மாவட்டம், புங்கத்துாா் பகுதியை சோ்ந்த லோகநாதன்(25) ஆகிய இருவரும் தொழிற்சாலையில் இருந்து செப்பு பொருள்களை திருடிச் சென்றது போலீஸாா் விசாரணையில் தெரிய வந்துள்ளது.

இதையடுத்து, மதன்,லோகநாதன் ஆகிய இருவரை, ஸ்ரீபெரும்புதுாா் போலீஸாா் கைது செய்து, நீதிமன்றத்தில் ஆஜா்படுத்தி சிறையில் அடைத்தனா்.