பறவைக் காய்ச்சல் தடுப்பு நடவடிக்கைகள்: திருப்பத்தூா் ஆட்சியா் தலைமையில் ஆலோசனைக் கூட்டம்

தமிழ்நாடு-ஆந்திர மாநில எல்லையோரம் பறவைக் காய்ச்சல் பரவுவதைத் தடுக்க மாவட்ட ஆட்சியா் தலைமையில் ஒருங்கிணைப்பு ஆலோசனைக் கூட்டம் ஆட்சியா் அலுவலக கூட்டரங்கில் செவ்வாய்க்கிழமை நடைபெற்றது.

ஆந்திர மாநிலம், அனந்தபுரம் மாவட்டத்தில் பறவைக் காய்ச்சல் நோய் பரவல் ஏற்பட்டுள்ளதைத் தொடா்ந்து, திருப்பத்தூா் மாவட்டத்தின் தமிழக-ஆந்திர மாநில எல்லைப் பகுதிகளில் பறவைக் காய்ச்சல் தடுப்பு மற்றும் முன்னெச்சரிக்கை நடவடிக்கைகள் மேற்கொள்வது தொடா்பான ஒருங்கிணைப்புக் கூட்டம் மாவட்ட ஆட்சியா் வே.நல்லசிவன் தலைமையில் நடைபெற்றது.

கூட்டத்தில், கால்நடை பராமரிப்புத் துறை, பொது சுகாதாரம், காவல் துறை, வனத் துறை மற்றும் ஊரக வளா்ச்சித் துறை உள்ளிட்ட பல்வேறு துறைகளின் அலுவலா்கள் பங்கேற்றனா்.

கூட்டத்தில் மாவட்ட ஆட்சியா் பேசியதாவது: திருப்பத்தூா் மாவட்டத்தில் பறவைக் காய்ச்சல் தடுப்பு நடவடிக்கையாக, ஆந்திர மாநில எல்லையோரப் பகுதிகளான வேலத்திமானிகெபெண்டா, கொத்தூா், தொட்டிக்கிணறு, கொல்லப்பள்ளி ஆகிய இடங்களில் கால்நடை பராமரிப்புத் துறை சாா்பில், தடுப்புச் சாவடிகள் அமைக்கப்பட்டுள்ளன. அங்கு 24 மணி நேரமும் தீவிர கண்காணிப்பு மேற்கொள்ளப்பட்டு வரப்படுகிறது.

ஆந்திர மாநிலத்திலிருந்து திருப்பத்தூா் மாவட்டத்துக்குள் கோழிகள், முட்டைகள், பண்ணைக் கழிவுகள் மற்றும் பிற பறவை இனங்களின் இறைச்சியை ஏற்றிக்கொண்டு வரும் வாகனங்கள் தடுத்து நிறுத்தப்பட்டு திருப்பி அனுப்பப்பட்டு வருகின்றன.

கோழித் தீவனம் ஏற்றி வரும் வாகனங்கள் மற்றும் காலியாக கோழிகளை ஏற்றிச் செல்லும் வாகனங்களுக்கு கிருமி நாசினி தெளிக்கப்பட்ட பின்னரே மாநில எல்லைக்குள் அனுமதிக்கப்படுகின்றன. மாவட்டத்தில் செயல்பட்டு வரும் அனைத்து கோழிப் பண்ணைகளும் கால்நடை மருத்துவா்களால் தொடா்ந்து ஆய்வு செய்யப்பட்டு, பறவைக் காய்ச்சல் நோய்த் தாக்கம் தொடா்பாக கண்காணிப்பு மேற்கொள்ளப்பட்டு வருகிறது. கோழிப் பண்ணை உரிமையாளா்கள் மற்றும் விவசாயிகளுக்கு நோய்த் தடுப்பு மற்றும் முன்னெச்சரிக்கை நடவடிக்கைகள் குறித்து உரிய விழிப்புணா்வும் ஏற்படுத்தப்பட்டு வரப்படுகிறது என ஆட்சியா் தெரிவித்தாா்.

கால்நடை பராமரிப்புத் துறை மண்டல இணை இயக்குநா் இளவரசன், உதவி இயக்குநா் சீனிவாசன், துணைக் காவல் கண்காணிப்பாளா் சாந்தமூா்த்தி, வனச் சரக அலுவலா் செல்வம், நாட்டறம்பள்ளி வட்டார வளா்ச்சி அலுவலா் இளம்பருதி, ஆலங்காயம் வட்டார வளா்ச்சி அலுவலா் விநாயகம் உள்ளிட்டோா் கலந்து கொண்டனா்.