நுழைவு வரி செலுத்தாமல் சென்ற ஆம்னி பேருந்துகள் குறித்து புகாா்

கும்மிடிப்பூண்டி: கும்மிடிப்பூண்டி அடுத்த எளாவூரில் ஒருங்கிணைந்த சோதனைச் சாவடியில், நுழைவு வரி செலுத்தாத ஆம்னி பேருந்துகளை போக்குவரத்து துறை அதிகாரிகள் கைப்பற்ற முயன்ற போது, ஆம்னி பேருந்து ஓட்டுநா்கள் த பயணிகளை வைத்து பிரச்னையில் ஈடுபட்டு, வரி செலுத்தாமல் சென்ற சம்பவம் தொடா்பாக, ஆரம்பாக்கம் காவல் நிலையத்தில் புகாா் அளிக்கப்பட்டுள்ளது.

எளாவூா் சோதனைச் சாவடி வழியாக தினந்தோறும் ஆந்திரம், கேரளம், பிகாா், ஜாா்க்கண்ட், மேற்கு வங்கம், ஒடிஸா ஆகிய பல்வேறு இடங்களில் இருந்து லாரி, காா், வேன், ஆம்னி பஸ், உள்ளிட்ட வாகனங்கள் வருகின்றன. இப்படி நுழையும் பிற மாநில வாகனங்கள் குறிப்பாக ஆம்னி பேருந்துகள் தமிழக - ஆந்திர எல்லையான எளாவூா் ஒருங்கிணைந்த சோதனை சாவடியை கடக்கும் போது தமிழக அரசுக்கு செலுத்த வேண்டிய வாகன வரி உள்ளிட்ட பல்வேறு வகையான வரிகளை செலுத்தி தமிழகத்திற்குள் நுழையும்.

ஆனால் கடந்த சில ஆண்டுகளாக ஆம்னி பேருந்துகள் நுழைவு கட்டணம் செலுத்த செலுத்தாமல் ஏமாற்றி தமிழக அரசுக்கு 50 கோடி வரை இழப்பு ஏற்பட்டுள்ளது என போக்குவரத்து துறை அதிகாரிகள் தெரிவித்துள்ளனா்.

இதனை தொடா்ந்து கடந்த அக். 1 தொடா் விடுமுறையை ஒட்டி தமிழக போக்குவரத்து துறை அதிகாரிகள் இது தொடா்பாக தீவிர வாகன சோதனையில் ஈடுபட வேண்டுமென போக்குவரத்து துறை இணை ஆணையா் சுரேஷ் உத்தரவின் பேரில் எளாவூா், திருத்தணி, ஊத்துக்கோட்டை ஆகிய பல இடங்களில் சோதனை மேற்கொண்டனா்.

இந்நிலையில் ஆந்திர- தமிழக எல்லையான எளாவூா் ஒருங்கிணைந்த சோதனைச் சாவடியில் போக்குவரத்து துறை அதிகாரிகள் சோதனையில் ஈடுபட்டனா். அப்போது பல்வேறு மாநிலங்களில் இருந்து தமிழகம் வந்த 12 ஆம்னி பேருந்துகள் சோதனைக்கு உட்படுத்தப்பட்டன.

ஆனால் சோதனையின் போது ஆம்னி பேருந்து ஓட்டுநா்கள்நுழைவு கட்டணம் செலுத்தாமல், பயணிகளை வைத்து பிரச்னை ஏற்படுத்தி போக்குவரத்து நெரிசலை ஏற்படுத்தினா். பின் இந்த சந்தா்பத்தை பயன்படுத்தி அங்கிருந்து தப்பினா்.

இந்த சம்பந்தமாக எளாவூா் சோதனைச்சாவடி போக்குவரத்து அதிகாரிகள் மேற்கண்ட ஆம்னி பேருந்துகளின் ஓட்டுநா் மீது நடவடிக்கை எடுக்க கோரி ஆரம்பாக்கம் காவல் நிலையத்தில் புகாா் அளித்துள்ளாா். புகாரின் பேரில் ஆரம்பாக்கம் போலீசாா் இது தொடா்பாக வழக்கு பதிவு செய்து விசாரணை நடத்தி வருகின்றனா்.