இளைஞர் வீட்டில் பெட்ரோல் குண்டு வீசப்பட்ட வழக்கில் இருவர் கைது

வேலூரில் ரூ. 1 கோடி கேட்டு கடத்தப்பட்ட பட்டதாரி இளைஞர் வீட்டில் பெட்ரோல் வீசப்பட்ட வழக்கில் தேடப்பட்டு வந்த இருவர் கைது செய்யப்பட்டனர். 
வேலூர் விருதம்பட்டு டாக்டர் ராதாகிருஷ்ணன் நகரைச் சேர்ந்தவர் ரமேஷ். இவர், லாரி சர்வீஸ் சென்டர் நிறுவனத்தில் மேலாளராகப் பணியாற்றி வருகிறார். இவரது மகன் டிஜோவை (22), மர்மக் கும்பல் கடந்த ஆகஸ்ட் 16-ஆம் தேதி காரில் கடத்திச் சென்று ரூ. 1 கோடி கேட்டு மிரட்டினர்.
இதுதொடர்பாக விருதம்பட்டு காவல் நிலையத்தில் புகார் அளித்ததை அடுத்து, 18-ஆம் தேதி ரங்காபுரம் பகுதியில் டிஜோவை கடத்தல் கும்பல் விடுவித்துவிட்டு காரில் தப்பிச் சென்றனர். கடத்தலுக்கு பயன்படுத்திய காரின் எண்ணைக் கொண்டு போலீஸார் நடத்திய விசாரணையில், டிஜோவை கடத்தி பணம் கேட்டு மிரட்டியதாக வேலூர், சாய்நாதபுரம் பகுதியைச் சேர்ந்த சரவணன் (35), காட்பாடி காங்கேயநல்லூர் சாலையைச் சேர்ந்த திலீப்குமார் (35) என்பது தெரியவந்தது. இதையடுத்து இருவரையும் போலீஸார் கைது செய்தனர். தலைமறைவான மன்சூர் உள்பட மேலும் 4 பேரை போலீஸார் தேடி வருகின்றனர்.
இதனிடையே, அடையாளம் தெரியாத நபர்கள் கடந்த செப்டம்பர் 1- ஆம் தேதி அதிகாலை டிஜோவின் வீட்டின் முன் பெட்ரோல் குண்டு வீசிவிட்டு தப்பிச் சென்றனர். இதில் வீட்டின் வெளியே நிறுத்தப்பட்டிருந்த 4 பைக்குகள், வீட்டினுள் இருந்த குளிர்சாதன கருவி, பல்வேறு பொருள்களும் எரிந்து நாசமாகின.
இதுகுறித்து விருதம்பட்டு போலீஸார் வழக்குப்பதிவு செய்து விசாரணை நடத்தி வந்தனர். இந்நிலையில், டிஜோ வீட்டில் பெட்ரோல் குண்டு வீசிய வழக்கில் வேலூர் குளக்கரை பகுதியைச் சேர்ந்த பாலமுருகன் (20), ரஹீம் (21) ஆகிய இருவரை போலீஸார் செவ்வாய்க்கிழமை கைது செய்தனர்.